Bu vərdişlər elektromobil batareyasını tez sıradan çıxarır

Elektrikli nəqliyyat vasitələrinin istifadəsi artdıqca, mütəxəssislər sürücüləri akkumulyatorun ömrünü sürətlə azaldan səhvlərə qarşı xəbərdar edirlər.

News365.az xəbər verir ki, elektrikli avtomobillərdə batareya ən bahalı hissədir və onun dəyişdirilməsi 5000–20000 dollar arasında dəyişir. Lakin düzgün istifadə və şarj vərdişləri ilə bu müddəti 20 ildən çox uzatmaq mümkündür. Buna baxmayaraq, bir çox sürücülər batareyaya səssizcə zərər vuran amillərdən xəbərsizdir.

Mütəxəssislərin sözlərinə görə, elektrikli avtomobillərin hər gün 100% doldurulması akkumulyator hüceyrələrində həddindən artıq istiləşmə yaradır və bu da elektrodların zədələnməsi ilə nəticələnir. Gündəlik istifadə üçün optimal şarj səviyyəsi 20–80% arası sayılır. Yüksək gərginlik batareyanın kimyəvi quruluşunu tez köhnəldir və tutum itkisinə səbəb olur.

Digər kritik səhv batareyanın tam boşalma həddinə çatdırılmasıdır. Şarj səviyyəsi 1–2 faizə düşdükdə hüceyrələr yüksək gərginlik altında qalır və bu proses akkumulyatora ciddi zərər verir. Mütəxəssislər bildirirlər ki, şarj göstəricisi 20%-dən aşağı düşdüyü anda avtomobil doldurulmalıdır.

Həmçinin akkumulyatorun çox isti və ya soyuq temperaturda şarj edilməsi də ömrü qısaldan əsas problemlərdəndir. Soyuq havada batareyanın diapazonu 10–36 faiz azalır, isti şəraitdə isə hüceyrələrdə kimyəvi deqradasiya başlayır. Bu səbəbdən avtomobili kölgədə saxlamaq, sərin saatlarda şarj etmək və qışda batareyanın istilik sistemi aktivləşənə qədər gözləmək tövsiyə olunur.

Şarj kabellərinin keyfiyyəti də xüsusi önəm daşıyır. Zədələnmiş və ya qeyri-orijinal kabellərin istifadəsi qısaqapanma və yanğın təhlükəsi yaradır. Hər şarjdan əvvəl kabelin vəziyyətinin yoxlanılması vacibdir.

Mütəxəssislərin diqqət çəkdiyi digər mühüm məqam proqram təminatının yenilənməsidir. Bildirilir ki, elektrikli avtomobillərdə proqram yeniləmələri yalnız multimedia sistemi üçün nəzərdə tutulmayıb. Bu yeniləmələr akkumulyatorun istilik idarəetməsini yaxşılaşdırır, həddindən artıq qızmanın və donmanın qarşısını alır, həmçinin nasazlıqların erkən aşkar olunmasına imkan verir. Ona görə də avtomobilləri avtomatik yeniləmə rejimində saxlamaq və ya mütəmadi olaraq əl ilə yoxlamaq məsləhət görülür.