Tariximiz
milli baxışla yenidən işlənib yazılmalıdır. Yetmiş ildən artıq Sovet
ideologiyasının təsiri ilə bizə tarix adı ilə sırınmış bir çox mənbələr gələcək
nəsillər üçün yanıldıcı, ziddiyyətli və anti-milli maraqlara xidmət edir. Bir
çox obrazlar Sovet vaxtı bizə tarixi şəxsiyyətlər kimi qəbul etdirilib. Hansı
ki, o simalar Azərbaycanın milli tarixinə yox, kommunist ideoloji siyasi xəttinə,
Rus imperializminə sərf və xidmət edib. Özümüzün həqiqi tariximiz təhrif
olunub, əsl tarixi simalarımız isə xalq düşməni, istilaçı, istismarçı ləkəsi ilə
unutdurulub. Atabəylər, Əfşarlar, Qacarlar mənfi obrazda təqdim edilib, ancaq
Xürrəmilər, Səfəvilər isə qabardılıb. Babək Xürrəmi də Sovet vaxtı süni
şişirdilmiş obrazdır. Əslində Babəkin türk tarixinə, ortaq türk milli irsinə,
Azərbaycana bir aidiyyatı yoxdur. Babəkin dini və milliyyəti də mübahisəlidir.
Batini-İsmaili Ğulat cərəyanının Xürrəmilər şöbəsinə mənsub olan bu sima əsasən
Məzdəkin dinini dirçəldirdi və baş qaldırdığı ərazidəki millətlərdən də istifadə
edirdi. Onun üsyanına milli mübarizə donu Sovet dövründə geydirilib. Əmin, Məmun
Mötəsim kimi Abbasi xəlifələrinin dövründə xilafət demək olar ki, türklər tərəfindən
idarə olunurdu. Ordunun aparıcı gücü demək olar ki, türklərdən ibarətdi. Babəklə
savaşan qoşun başçılarının hamısı türk idi. Böyük Buğa, Kiçik Buğa, Afşin türk
idi. Vaxtilə Sasani imperiyasının süqutundan sonra farslar şüubiyyə təşkilatını
qurdular. Bu batini, gizli bir təşkilat idi. Özəyi ikinci xəlifə Ömər bin Xəttabın
fars Firuz Əbu Lulu tərəfindən qətlə yetirilməsi dövründən başlayır. Sasani
imperiyasının rüsvayçı şəkildə məğlub edilməsini zadəganlar, mülkədarlar, mənsəb
sahibi farslar əsla əfv etmək istəmədilər. Üzdə müsəlman olsalar da içəridən
qisas almağı hədəf seçdilər. Yenidən öz dövlətlərini qurmaq, İslam donu
geydirilmiş ideologiyalarını yaşatmaq üçün şüubiyyə təsisatı çərçivəsində
Büveyhilər dövlətini qurdular. İndiki İran ərazisində Həşşaşilər, Bəhreyndə Qərmətilər
rejimini yaratdılar. Beləliklə İslam dinini ideoloji olaraq rəsmən parçaladılar,
dövlət dini olaraq ikiyə bölünmüş formaya gətirdilər. Artıq fərqli şəriət, fərqli
matəm və bayramlar təsis edildi. Xürrəmilik də bu batini ideologiyanın tərkibi,
davamı idi. Babək xilafətə qarşı savaşırdı, həmin dövrdə xilafəti türklər idarə
edirdi. Xəlifələr ordunun təsiri altında idilər. Hətta xəlifələrin vəfatından
sonra hansı övladının varisi olacağını belə türklər təyin edirdi.
642 - ci ildə
Sasani imperiyasının qoşunları İslam ordusu tərəfindən məğlub edildikdən sonra
müsəlmanlar indiki İran, Güney Azərbaycan coğrafiyasına təmas etdilər. İslam
dini yayılmağa başladı. Hətta həmin dövrlərdə xilafətin Azərbaycan valiləri fəaliyyət
göstərirdi. Xəlifə Həzrət Əlinin Azərbaycan valisi Əşəs bin Qeysə Azərbaycan
xalqı barədə məktubları, tövsiyyələri, əmrnamələri var. Əməvilər dövrünə qədər
demək olar ki, Güney Azərbaycanın əksəriyyəti müsəlman olmuşdu. Şimali Azərbaycanda
isə hökmdar Cavanşir xəlifə Müaviyyə ilə saziş bağlayıb vergi ödəməklə xalqın
dininə toxunmamaq haqda ondan əhd almışdı. Cavanşirdən sonra isə xilafət
orduları Şimali Azərbaycana ayaq açdı, artıq əhalinin müsəlman olması başlandı.
Əməvilər dövrünə aid Şamaxı şəhərində məscid var. Bundan başqa həm Şimalda, həm
Cənubda əhalinin Abbasilərə qədər müsəlman olmasını təsdiqləyən faktlar var.
Babəkə qədər Azərbaycan əhalisi müsəlman olmuşdu, hətta fərqli siyasi, dini təriqətlərə
də bölünmüşdü. Cənubda fəaliyyət göstərən fars şüubiyyəsi İslam daxilində təriqət
istehsal etməyə başlamışdı. Babəkin özünün də adının Həsən, atasının adının
Abdullah qardaşının adının Muaviyyə
olması onların da zahirən müsəlman olduğunu göstərir. Babək hərəkatı fars
Sasani ideoloji siyasi cərəyanın təsis və təşkil etdiyi anti - türk, anti-islam
üsyanı idi. Həmin dövrdə xəlifə ordudakı farsları uzaqlaşdırmış, onların yerinə
türkləri başa keçirmişdi. Zatən Babəklə savaşan sərkərdələr də türklər idi.
Məhəmməd
Əmin Rəsulzadə “Əsrimizin Səyavuşu” əsərində Babək haqqında yazırdı:
“Rusiyada
rus vətənsevərliyinin Aleksandr Nevski, Minin-Pojarski kimi qəhrəmanları,
Suvorov, Kutuzov, Baqration və sairə kimi rus imperatorluğunun tarixi sərkərdələri
yüksək bir əda ilə öyülərək göylərə qaldırılarkən, Azərbaycanda vətən və milli
istiqlal uğrunda unudulmaz mübarizəsilə tanınmış Dağıstanın böyük imamı Şamil
ilə Gəncənin igid müdafiəçisi Cavaddan bəhs etmirlər. Bunun yerinə isə Azərbaycan
tarixinin dərinlikləri aranaraq, oradan Babək kimi şəxsiyyətlər çıxarılıb
ideallaşdırılır. Babək islamiyyətin düşməni idi. Bir islamiyyətin ki, indiki şəraitdə
“kommunizm”ə az əngəllər törətmir. Babək Azərbaycanı Şimala deyil, Cənuba qarşı
qoyurdu. Bu halda da o, sovetlər Birliyinin ehtimal olunan düşməninə qarşı
savaşın rəmzi ola bilər... "
Babək İslama
qarşı heç də qədim türk dövlətçiliyini bərpa etmək üçün yaxud Tengriçilik ya
Şamanizm inancını dirçəltmək üçün çalışmırdı. O qədim fars sisteminə xidmət
edirdi. Babəkin həmin fars ideoloji-inancının müasir fərqli üsulda ortaya
çıxmış davamçıları bu gün Azərbaycanda "Tarqoviy" küçəsində piket
keçirib dinlərini yenidən dirçəltmək istəyirlər. Qiyamət yoxdu, ruhlar bədəndən
bədənə keçir deyirlər. İmamların ruhu da guya sonuncu İmamları Əhməd əl Həsənin
timsalında zühur edibmiş... İçkini, narkotiki halal sayırlar. Nikahdan kənar
evlilik, əks cinslərin evlənməsi caizdir onlara görə. Bunlar kimdir? Həmin
batini fars ideologiyasının İslam aləminə yayılmış töküntüləri. Tarixi, fəlsəfi
əsaslarını Babək zamanından bu yana şüubiyyə farslarının uydurub hədis adı ilə
İslam aləminə qəbul etdirdiyi mənbə, məxəzlərdən alıblar. Müasir anti - islam,
anti - türk prinsiplərini isə Qərbin dağıdıcı qüdrətlərindən əxz edib
mayalanırlar. Tanış gəlirmi? Cavidanın ruhu da Babəkə keçmişdi. Xüsusi gecələr
təşkil olunub arvad - kişi bir - birinə qarışırdı. Şərab, hər cür içki halal
idi. Xürrəmilik məhz fars batini - gizli şüubiyyəsinin bir şöbəsi idi. Bu
prinsiplərə görə əsas ideoloqlar üzə çıxmamalıdır. Savaşılacaq, mübarizə
aparılacaq tərəfin öz millətindən, öz dinindən bir lider ortaya çıxarılmalıdır
ki, Babəki Cavidandan sonra pərdə arxasından qabağa itələyənlər vardı.
Həmin dövrdə
xilafət tərkibində olan Azərbaycanda heç də istila, istismar həyata keçirilməyib,
əksinə xilafətin ən stabil vilayətlərindən olub. Elə olmasa idi Gəncədə dəfn
olunmuş İmam övladı, Bibiheybətdə dəfn olunmuş İmam qızı və digərləri Azərbaycana
təşrif gətirməzdilər. Babək zamanında yaşamış Əhli Beyt İmamları da onun
üsyanını irtida (dindən dönmə) üsyanı hesab ediblər, heç bir münasibət
saxlamayıblar. Baxmayaraq ki, bəzi vaxtlarda xilafətə qarşı üsyanlar Əhli Beyt
adı ilə qaldırılırdı. Necə ki, Əbu Müslim Xorasani də Əməvilərə qarşı Əhli Beyt
adı ilə üsyan aşmışdı. Babək isə türk xalqları üçün əsla xarakterik olmayan
dini-siyasi ideoloji cərəyan üzərindən üsyan aparırdı. Xürrəmilik sırf fars
şüubiyyə təfəkkürünə əsaslanan batini bir təriqətdir, təməlində qətiyyətli türk
və islam düşmənçiliyi dayanır. Sovet dövrünə qədər Babək adlı adam olmayıb Azərbaycanda.
Atabəylər, Nadir şah, Qacar, Cavad xan kimi simalar əvəzinə Sovet imperiyası
Babəki və bir sıra qaçaq - qulduru bizim milli qəhrəmanlarımız kimi beyinlərə
yeridib. Yəni sizin qəhrəmanlarınız budur, meşədə 5-10 nəfəri başına yığıb
qaçaqlıq etməkdən o tərəfə keçməyiblər. Ancaq Azərbaycan xalqının əsl qəhrəmanları
dışlanıb, ögeyləşdirilib. Az vaxt deyil, 70 il ərzində beyinlərdə kök salmış bu
düşüncənin, hətta inancın yanlış olduğunu sübut etmək üçün əlavə bir 70 il də
lazım olacaq.
Tural İrfan,
MCP sədrinin müavini