Azərbaycan mütəxəssisləri Ermənistanda: Naxçıvan üçün strateji addım

Azərbaycandan Naxçıvana Ermənistandan keçəcək elektrik xəttinin layihəsi hazırdır – İlham Əliyev

Azərbaycan Prezidenti İlham Əliyev yerli televiziya kanallarına müsahibəsində bildirib ki, ölkənin əsas ərazisindən Ermənistan ərazisindən keçməklə Naxçıvana elektrik verilişi xəttinin çəkilməsi layihəsi artıq hazırdır.

News365.az xəbər verir ki, Dövlət başçısının sözlərinə görə, işğaldan azad edilmiş Cəbrayıl rayonunda iri yarımstansiya tikilib. Konvertor yarımstansiyası kimi fəaliyyət göstərən bu obyekt daxili istehlak üçün deyil, məhz böyük həcmdə elektrik enerjisinin ötürülməsi – "Zəngəzur Elektrik Dəhlizi" üçün nəzərdə tutulub.

Müsahibədə vurğulanıb ki, xəttin keçəcəyi Ermənistan ərazisində də hazırlıq işləri aparılıb. Azərbaycanlı mütəxəssislər qonşu ölkəyə səfər edərək elektrik dirəklərinin quraşdırılacağı əraziləri müəyyənləşdiriblər. Bakı Ermənistan tərəfinin ləngimədən işlərə başlayacağına ümid edir, çünki iki ölkənin enerji sistemlərinin birləşdirilməsi birinci növbədə İrəvanın öz maraqlarına cavab verir.

Azərbaycan mütəxəssislərinin səfəri Ermənistanda müəyyən narazılıqlara səbəb olsa da, Baş nazir Nikol Paşinyan keçirdiyi brifinqdə məsələyə aydınlıq gətirib. Paşinyan bildirib ki, bu səfər elektrik xətti və dəmir yolu üzrə daha əvvəl elan edilmiş işçi görüşlər çərçivəsində tutulub. O, prosesin rəsmi şəkildə idarə olunduğunu və gələcəkdə bu cür təmasların davam edəcəyini vurğulayıb.

News365.az