Zərərli energetik içkiləri bazardan niyə çıxarılmır? - Ekspertdən ETİRAZ

Azərbaycan Qida Təhlükəsizliyi Agentliyi tərəfindən aparılan nəzarət tədbirləri zamanı “Orxan 011” MMC-nin Türkiyədən idxal etdiyi “Paril Gida Alkoqolsuz Fonksiyonal İçecekler” müəssisəsinin istehsalı olan “Nitro Max” əmtəə nişanlı energetik içki məhsulu partiyalarında dərman vasitələrinin tərkibində istifadə olunan Sildenafil maddəsi aşkarlanıb. Faktla bağlı qanunuvericiliyə uyğun müvafiq tədbirlər görülərək məhsul partiyalarının gömrük ərazisinin hüdudlarından kənara çıxarılması və ya məhv edilməsi barədə qərar qəbul edilib.

Qeyd edək ki, Sildenafil maddəsi bəzi orqan və sistem xəstəliklərinin müalicəsində istifadə olunur. Həkim nəzarəti olmadığı halda insan həyat və sağlamlığına mənfi təsir göstərərək ciddi fəsadlar törədə bilər. Sildenafilin qəbulu baş ağrıları, qızdırma və ürəkbulanmaya səbəb ola bilir. Bununla yanaşı, görmənin qəfil itirilməsi və ya bulanıq görmə, nəfəs darlığı, sinədə ağrı kimi simptomlarla müşayiət edilə bilər. İnsult və ya infarkt keçirmiş, ciddi ürək və ya qaraciyər problemi olan şəxslər üçün xüsusilə təhlükəli hesab edilir.

Nəzərə alaq ki, hazırda əmtəə bazarında “Nitro Max” adlı energetik içkiləri hələ də var. Amma həmin məhsulların bazardan yığışdırılması isə yada düşmür.

Mövzu ilə bağlı News365.az -a danışan Azad İstehlakçılar İctimai Birliyinin sədri Eyyub Hüseynov deyir ki, əgər adı çəkilən maddə insan sağlamlığı üçün zərərlidirsə dərhal həmin məhsullar əmtəə bazarından yığışdırılmalıdır:

“Çox təəssüf ki, ölkəmizdə malların geri çağırılma mexanizmi yoxdur. Bu azmış kimi başqa bir problem də var. Belə ki, vaxtı keçmiş məhsullar atılmır, yığılaraq distribütörə qaytarılır. O da həmin məhsulları istehsalçıya təhfil verir. İstehsalçı da məhsul üzərində bəzi dəyişikliklər edərək onu yenidən istehlak bazarına göndərir. İctimai təşkilat olaraq hər zaman tələb etmişik ki, vaxtı keçmiş məhsullar birbaşa zibilxanalara getməlidir. Lakin bu məsələ hələ də açıq qalıb. Qayıdıram yenə zərərli məhsullara. AQTA hansısa məhsulda insan sağlamlığı üçün qorxulu nəsə tapıbsa dərhal həmin məhsullar bazardan çıxarılmalıdır. Belə vəziyyətdə AQTA-nın işi 0-a bərabər olur. Bu da qanunvericilikdəki boşluqlarla bağlıdır. Bu boşluqları aradan qaldrımaq da müvafiq dövlət qurumlarının vəzifəsidir. Eyni zamanda zərərli məhsullar və vaxtı keçmiş mallar ictimaiyyət nümayəndələrinin iştirakı ilə məhv edilməlidir. Amma belə hadisələr çox nadir hallarda baş verir. Halbuki hər gün dövriyyədə vaxtı keçmiş tonlarla məhsulllar olur”.

News365.az