Polad Bülbüloğlunun evləndiyi əməkdar artist - DOSYE
Milli Məclisin Mədəniyyət komitəsinin 81 yaşlı sədri, Xalq artisti Polad Bülbüloğlunun üçüncü dəfə ailə qurması ilə bağlı məlumatlar yayılıb. Onun Azərbaycanın Əməkdar artisti, tanınmış rəqqasə və pedaqoq Eteri Cəfərova ilə evləndiyi bildirilir.
Bəs Eteri Cəfərova kimdir, hansı sənət yolunu keçib və hansı uğurlara imza atıb?
News365.az Polad Bülbüloğlunun yeni həyat yoldaşı olduğu bildirilən Eteri Cəfərovanın dosyesini təqdim edir.
Eteri Leonidovna Cəfərova 9 iyul 1978-ci ildə Bakıda anadan olub. Onun Azərbaycan rəqs sənətində peşəkar fəaliyyəti hələ yeniyetməlik və tələbəlik illərindən başlayıb. O, 1985–1991-ci illərdə 214 nömrəli məktəbdə təhsil alıb. Daha sonra Bakı Xoreoqrafiya Məktəbinin Xalq şöbəsinə daxil olub və 1996-cı ildə “ansambl artisti” ixtisası üzrə məzun olub. Cəfərovanın səhnəyə ilk addımları da məhz həmin illərə təsadüf edir. Bakı Xoreoqrafiya Məktəbinin sonuncu sinfində təhsil alarkən Azərbaycan Dövlət Rəqs Ansamblının bədii rəhbəri, Xalq artisti Afaq Məlikova tərəfindən ansambla rəqqasə kimi dəvət olunub. 1996-cı ilin mayından Azərbaycan Dövlət Filarmoniyasının Dövlət Rəqs Ansamblında fəaliyyətə başlayan Eteri Cəfərova burada uzun illər səhnə təcrübəsi qazanıb. Lakin onun fəaliyyəti yalnız səhnə ilə məhdudlaşmayıb. 1996–2000-ci illərdə Azərbaycan Dövlət Mədəniyyət və İncəsənət Universitetinin Mədəni-maarif fakültəsində ali təhsil alan Cəfərova sonrakı illərdə akademik istiqamətdə də inkişaf edib. 2016-cı ildə Bakı Xoreoqrafiya Akademiyasının “Xoreoqrafiya sənəti” ixtisası üzrə magistratura pilləsinə qəbul olunub və təhsilini fərqlənmə diplomu ilə başa vurub. 2018-ci ildə isə Moskva Dövlət Mədəniyyət İnstitutunda müasir xoreoqrafiya üzrə ixtisasartırma kursu keçib.Hazırda Eteri Cəfərova Bakı Xoreoqrafiya Akademiyasının Milli və müasir rəqs kafedrasının baş müəllimi kimi fəaliyyət göstərir. O, burada Azərbaycan rəqsi, müasir rəqs və xalq səhnə rəqsi fənlərini tədris edir. Cəfərova eyni zamanda elmi fəaliyyətlə də məşğuldur. O, Bakı Xoreoqrafiya Akademiyasının doktorantıdır. Bununla yanaşı, Moskva Dövlət Xoreoqrafiya Akademiyasında assistent-stajor kimi təhsil alır və çalışır.
Quruluşçu-xoreoqraf kimi də tanınır
Eteri Cəfərovanın yaradıcılığında quruluşçu-xoreoqraf fəaliyyəti də xüsusi yer tutur. O, müxtəlif Azərbaycan musiqi nümunələri əsasında rəqs kompozisiyalarının quruluşunu hazırlayıb. Bu sırada V.Adıgözəlovun “Qərənfil”, “Sarı gəlin” xalq mahnısı, M.Tağıyevin repertuarından “Qalx, qalx, ulu torpaq!”, F.Əmirovun “Mən səni araram”, “İnnabı”, “Dağlı”, “Qavalla”, “Qaraçı” və Osetin rəqsi kimi kompozisiyalar yer alır.
Onun pedaqoji fəaliyyətində tələbələrinin uğurları da diqqət çəkir. Cəfərovanın tələbəsi Tutu Tahirli Qəmər Almaszadə adına Klassik və Milli Rəqs üzrə I Beynəlxalq Müsabiqədə birinci yerin laureatı adına layiq görülüb.
Milli rəqsi elmi istiqamətdə də araşdırır
Eteri Cəfərova milli rəqs sənətinin inkişafı ilə bağlı elmi-tədqiqat fəaliyyəti də aparır. Onun məqalələri Bakı Xoreoqrafiya Akademiyasının “Sənət Akademiyası” jurnalında dərc olunub. Cəfərovanın elmi nəşrləri arasında “Müasir dövrün mədəni prosesində milli rəqs fenomeni”, “Rəqs sənətində tərbiyə və təhsil”, “Azərbaycan xalq səhnə rəqs sənətinin inkişafında Roza Cəlilova fenomeni” kimi məqalələr yer alır. Beləliklə, onun fəaliyyəti yalnız rəqs ifaçılığı ilə məhdudlaşmır. Eteri Cəfərova milli rəqsin səhnədə təbliği, gənc rəqqasların hazırlanması və bu sənətin elmi baxımdan araşdırılması istiqamətlərində də fəaliyyət göstərir.
Əməkdar artist və Prezident mükafatçısı
Eteri Cəfərovanın sənət fəaliyyətinə dövlət səviyyəsində də qiymət verilib. O, 17 sentyabr 2007-ci ildə Azərbaycan Respublikasının Əməkdar artisti fəxri adına layiq görülüb. 2010–2015-ci illərdə Prezident mükafatçısı olan sənətçi 2019-cu ildə milli rəqs sənətinə verdiyi töhfələrə görə “Humay” mükafatını alıb. 2021-ci ildə isə “Académie Internationale de Chorégraphie” tərəfindən “Fəxri akademik” fəxri adına layiq görülüb. Beləliklə, hazırda 48 yaşında olan Eteri Cəfərovanın sənət yolu Azərbaycan Dövlət Rəqs Ansamblının səhnəsindən başlayaraq pedaqoji və elmi fəaliyyətə qədər uzanır. Əməkdar artist, rəqqasə, quruluşçu-xoreoqraf, pedaqoq və tədqiqatçı kimi fəaliyyət göstərən Cəfərova Azərbaycan milli rəqs sənətinin müxtəlif istiqamətlərində uzun illərdir fəaliyyətini davam etdirir.
