Paşinyan keçmişin qisasını alır: İrəvanda böyük "təmizləmə" əməliyyatı
Ermənistanın daxili siyasi səhnəsində gərginlik pik həddə çatıb. Hakimiyyətin keçmiş rejimin nümayəndələrinə və revanşist qüvvələrə qarşı başlatdığı genişmiqyaslı həbslər və istintaq tədbirləri İrəvanda yeni siyasi eranın başlandığından xəbər verir. Nikol Paşinyanın "real Ermənistan" layihəsi çərçivəsində atdığı bu addımlar ölkənin həm daxili, həm də xarici kursunda həlledici mərhələyə qədəm qoyduğunu göstərir.
Mövzu ilə bağlı News365.az-a özəl açıqlama verən politoloq İlqar Vəlizadə bildirib ki, Paşinyan bu dəfə başladığı prosesi sonadək çatdırmaqda qərarlıdır:
Siyasi qalıqlardan imtina: Genişmiqyaslı cinayət işləri və fiqurantların çoxluğu göstərir ki, İrəvan rəhbərliyi "4-cü respublika" konsepsiyasını reallaşdırmaq üçün keçmişin siyasi yükündən tam azad olmaq niyyətindədir.
Şəxsi və siyasi təhlükəsizlik: Keçmiş rejimin nümayəndələri vaxtilə Paşinyanı həbsə atıblar və bu gün də hakimiyyətə gələcəkləri təqdirdə onu devirib məsuliyyətə cəlb edəcəklərini açıq bəyan edirlər. Bu təhdidlər baş naziri qarşı tərəfi qabaqlamağa məcbur edir.
Geosiyasi risklər və sülh gündəliyi: Paşinyan yaxşı anlayır ki, sülh prosesindən boyun qaçırarsa, böyük güclərin mübarizəsində qurbana çevrilə bilər. Sülh gündəliyinə sadiqlik onun siyasi sağ qalma şərtidir.
Moskvanın reaksiyası və dəyişən balans
Politoloq xüsusilə vurğulayıb ki, Rusiya faktorunun təsiri əvvəlki kimi effektiv deyil:
"Moskva ilə İrəvan arasında zamanında verilən 'Köçəryana toxunulmasın' zəmanəti və sövdələşmələri artıq geridə qalıb. Ermənistan Təhlükəsizlik Şurasının katibi Alen Simonyanla Rusiya rəsmiləri arasındakı təmaslarda bu mövzuların müzakirə olunduğu istisna edilmir. Paşinyan artıq özünü bu öhdəliklərlə bağlı hiss etmir. Rusiyanın əlində təzyiq rıçaqları kənarda qalsa da, Moskva yaxşı başa düşür ki, bu rıçaqları kəskin şəkildə işə salmaq onun özü üçün də ciddi təhlükə yarada bilər."
