Hindistan İslama və insanlığa qarşı müharibə aparır- TƏHLİL

Hindistan Pakistana qarşı hərbi əməliyyata başlayıb. Ötən gecə İslamabad cavab raket zərbəsi endirib.

Hindistan Müdafiə Nazirliyi Pakistanda 9 hədəfə ümumilikdə 9 raket zərbəsi endirdiyini bildirib. Yeni Dehli xüsusi olaraq vurğuladı ki, hədəflər Pakistan hərbi obyektləri deyil:

"Pakistanın heç bir hərbi obyektinə hücum edilməyib. Hindistan məqsəd və üsul seçimində kifayət qədər təmkin nümayiş etdirib".

ISPR (Pakistan Silahlı Qüvvələrinin media və ictimaiyyətlə əlaqələr qanadı) baş direktoru Əhməd Şərif Çaudri bildirib ki, Hindistanın raket zərbəsi nəticəsində Pakistanın Kotli şəhərində iki mülki şəxs həlak olub. Şərqi Əhmədpur şəhərində ən azı 12 nəfər yaralanıb. Çaudri Hindistanın iki məscidi vurduğunu iddia edir. Daha sonra Pakistan Müdafiə Nazirliyi 8 mülki vətəndaşın öldüyünü bildirib.

Pakistan rəsmiləri bildiriblər ki, ölkə ordusu iki Rafale təyyarəsi də daxil olmaqla beş Hindistan qırıcısını vurub.

Pakistanın cavabı

Pakistanın baş naziri Şahbaz Şərif Hindistanın hücumunu müharibə aktı adlandırıb. "Pakistanın Hindistanın tətbiq etdiyi bu müharibə aktına qəti şəkildə cavab vermək hüququ var və qətiyyətli cavab artıq verilib" deyə X-də yazıb.

Pakistan da hava məkanını 48 saat müddətinə bağlayıb və Hindistanın Kəşmirdəki sərhəd bölgələrinə cavab verib. Ölkənin silahlı qüvvələri Hindistan ordusu briqadasının qərargahını vurduqlarını bildiriblər. Samaa TV-yə mənbə bildirib ki, Pakistan ordusu Hindistan hərbi briqadasının yerləşdiyi ərazini məhv etməklə cavab verib. Onun sözlərinə görə, zərbələr “düşmən mövqelərində” çoxsaylı hədəflərə endirilib. Hindistan hakimiyyəti Pakistanın hücumu nəticəsində iki qadının yaralandığını bildirib.

Dünyanın reaksiyası

ABŞ prezidenti Donald Tramp Hindistan və Pakistan arasında münaqişənin gərginləşməsini “rüsvayçılıq” adlandırıb və onun tezliklə həllinə ümid etdiyini bildirib.

BMT Baş katibi Antonio Quterreşin sözçüsü Stefan Dujarrik deyib ki, Quterreş Hindistanın hərbi əməliyyatından son dərəcə narahatdır. O, hər iki ölkəni maksimum hərbi təmkin nümayiş etdirməyə çağırıb.

Reuters mənbələrə istinadən xəbər verir ki, Hindistan hakimiyyəti Rusiya, ABŞ, Böyük Britaniya, Səudiyyə Ərəbistanı və BƏƏ nümayəndələri ilə əlaqə saxlayıb, onları Pakistana qarşı əməliyyat barədə məlumatlandırıb. Yeni Dehli Pakistan ərazisinə endirilən zərbələrdən sonra ABŞ dövlət katibi Marko Rubio ilə söhbəti təsdiqləyib.

Hindistan insanlığa qarşı müharibə aparır.

İnsidentdən dərhal sonra Hindistan “Hind Suları Müqaviləsi”ndə iştirakını dayandırıb və Hind çayının Pakistana axınının qarşısını kəsib.

Hindistanın bu qərarı birbaşa olaraq insanlığa qarşı yönəlik bir addımdır. Çünki Pakistanın su ehtiyatları əsasən mənbəyi Hindistanda olan çaylar hesabına formalaşır. Ona görə də “Hindistan Suları Müqaviləsi”nin birtərəfli qaydada dayandırılması milyonlarla pakistanlını ölümə məhkum etməkdir.

Çox təəssüf ki, bu həssas və vacib məqama nə BMT, nə də digər ölkələr diqqət ayırırlar. Bu da onu göstərir ki, Cammu və Kəşmirdə baş verənlər təsadüfi deyil, planlaşdırılmış bir insidentdir.

Nəzərə alaq ki, bu ilin əvvəllərində Hindistanın rəsmi dairələrində təkcə Pakistana qarşı deyil, bütün müsəlman dünyasına qarşı çirkin kampaniya başlayıb.

Belə ki, Hindistan parlamenti 2025-ci il aprelin 3-də Vəqflər haqqında qanunu  qəbul edib. Sözügedən qanunda müsəlman dini və xeyriyyə fondlarının (vəqflərin) idarə olunmasında ciddi dəyişikliklər nəzərdə tutulur. Qanun ölkə daxilində geniş müzakirələrə və etirazlara səbəb olub.

Sözügedən qanuna əsasən, dini fondların idarəetmə şuralarında ən azı iki qeyri-müsəlman təmsil olunmalıdır. Üstəlik, yeni qanunla dini fondların baş icraçı direktoru vəzifəsinə qeyri-müsəlmanların təyin olunması mümkün olacaq.
 Bundan əlavə, Vəqflər haqqında qanun uzun müddət dini məqsədlərlə istifadə olunmuş əmlakların dini fondların əmlakı kimi tanınması prinsipini ləğv edir. Əgər bir əmlakın Vəqf və ya dövlət mülkiyyəti olduğu ilə bağlı mübahisə varsa, bu barədə qərarı yerli hakimlər verəcək.

Qanun, xüsusilə müsəlman icmaları və müxalifət partiyaları tərəfindən ciddi tənqid olunub. Çünki bu dəyişikliklər dini idarəetməyə müdaxilə deməkdir. Üstəlik, yeni qanun layihəsi bir çox tarixi məscid və dini obyektlərin hüquqi statusunu təhlükə altına qoyur. Ən çox narahatlıq doğuran məqam isə ondan ibarətdir ki, sözügedən qanun Vəqf əmlaklarının dövlət tərəfindən ələ keçirilməsi riskini artırır.

Bu səbəbdən, qanunun qəbulundan sonra Hindistanın müxtəlif bölgələrində, o cümlədən Murşidabad və Tripurada etiraz aksiyaları keçirilib. Bu aksiyalar zamanı bir neçə nəfər həlak olub və çox sayda insan həbs edilib. ​

Bu isə onu deməyə əsas verir ki, Hindistan Pakistanla münasibətləri gərginləşdirməklə həm də islamafob qərarlarını pərdələməyə çalışır.

Dehli nəyi planlaşdırır?

Məlum olduğu kimi 2 il sonra Hindistanda növbəti seçkilər keçiriləcək. Baş nazir Modi də seçki hazırlıqlarına indidən başlayıb. Xatırladaq ki, 2019-cu ildə də seçkilər ərəfəsində Cammu və Kəşmirin Pulvama bölgəsində Hindistanın CRPF (Mərkəzi Ehtiyat Polis Qüvvələri) konvoyuna hücum edilib və 40-dan çox Hindistan əsgəri həlak olub.

Bundan sonra sərhəddə toqquşmalar başlayıb və radikal ritorika seçən Modi seçkilərdə qalib gəlməyi bacarıb.

Göründüyü kimi tarix təkrar olunur. Hindistan hökuməti radikal ünsürlərin faşist istəklərini alovlandırmaqla yenidən çoxsaylı seçicinin rəğbətini qazanmaq istəyir. Amma bu olduqca qorxunc bir oyundur. Əhalisinə görə dünyanın ən böyük ölkəsi olan Hindistanda bu cür şovinist addımlar milyonlarla insanın ölümünə səbəb ola bilər. Eyni zamanda Asiyada yeni və çox qorxulu müharibənin alovlanması mümkündür.

Bu münaqişə kimlərə sərf edir?

Hindistanın qeyri-insani və məsuliyyətsiz addımları çox təəssüf ki, beynəlxalq ictimaiyyət tərəfindən heç də lazımi səviyyədə diqqətə alınmır. Əksinə, bəzi dövlətlər açıq şəkildə Cammu və Kəşmirdə baş verən insidentin qlobal müharibəyə çevrilməsinə çalışırlar.

Bunun üçün hər iki tərəfi qızışdıracaq məsuliyyətsiz və əsassız bəyanatlar getdikcə çoxalır. Amma bu tip bəyanatlar səsləndirənlər bir acı reallığı unudur ki, qarşı-qarşıya gələn ölkələrin hər ikisi nüva silahına sahibdir. Yəni, ən xırda məsuliyyətsiz addım dünyada ilk nüvə müharibəsinin başlamasını qaçılmaz edəcək.

News365.az