Dərmanları evdə bu yerlərdə saxlamayın – təsiri dəyişə bilər!

Dərmanların təsirini qorumaq üçün onların harada saxlanılması da mühüm əhəmiyyət daşıyır. Yanlış şərait preparatların keyfiyyətinə təsir göstərə və onların xüsusiyyətlərini dəyişə bilər.

News365.az xarici mətbuata istinadən xəbər verir ki, əczaçı Dafne Estevao dərmanların hamam otağında və mətbəxdə saxlanılmasını tövsiyə etmir.

Mütəxəssisin sözlərinə görə, hamamda yüksək rütubət və temperatur dəyişiklikləri, mətbəxdə isə yemək hazırlanarkən yaranan istilik və buxar dərmanların keyfiyyətinə mənfi təsir göstərə bilər.

Əczaçı preparatların günəş şüalarından və istilik mənbələrindən uzaq, quru yerdə saxlanılmasının vacibliyini vurğulayıb. Dərmanlar uşaqların və ev heyvanlarının əli çatmayan bağlı şkafda yerləşdirilməlidir.

Bununla belə, bütün dərmanlar üçün eyni saxlama qaydası keçərli deyil. Bəzi preparatların soyuducuda saxlanılması tələb olunur. Buna görə də hər bir dərmanın qablaşdırmasında göstərilən təlimatlara əməl etmək lazımdır.