ABŞ Səudiyyə Ərəbistanının “İbrahim sazişi”nə qoşmaq istəyir

ABŞ və Səudiyyə Ərəbistanı arasında potensial müdafiə sazişi birgə hərbi təlimləri genişləndirəcək və iki ölkənin müdafiə şirkətləri arasında əməkdaşlığı dərinləşdirəcək, eyni zamanda krallığın Çinlə hərbi-sənaye əlaqələrinə məhdudiyyətlər qoya bilər.

News365.az xəbər verir ki, bu barədə “Röyters” agentliyi öz mənbələrinə istinadla məlumat yayıb.

Noyabrın 18-də Səudiyyə Ərəbistanının vəliəhd şahzadəsi Məhəmməd bin Salman Əl-Səud 2018-ci ildən bəri ilk dəfə Vaşinqtona səfər edəcək və orada ABŞ prezidenti Donald Trampla görüşəcək.

Ər-Riyaddakı diplomatik mənbə bildirib ki, müdafiə sazişi danışıqların əsas mövzusu olacaq. Tərəflərin həmçinin krallığın İsrail ilə münasibətlərinin normallaşdırılması və “İbrahim sazişi”nə qoşulması imkanlarını müzakirə etmələri gözlənilir. Lakin Fələstin dövlətinin tanınması Səudiyyə Ərəbistanının bu cür addımlar atması üçün əsas şərt olaraq qalır. Krallıq nə İsrail hökuməti, nə də ABŞ administrasiyası tərəfindən Fələstinin tanınması məsələsində güzəştə getmək istəyi görmədiyindən, Səudiyyə rəsmiləri Ər-Riyad və Vaşinqton arasında müdafiə sazişinin şərtlərinin hazırlanmasına diqqət yetirirlər.

“Röyters” müdafiə müqaviləsinin ABŞ-ın Yaxın Şərqdəki tərəfdaşı kimi Səudiyyə Ərəbistanına təmin etməyə hazır olduğu müdafiə dərəcəsini müəyyən etmək məqsədi daşıdığını bildirir. Onların sözlərinə görə, müqavilə krallığın əvvəllər İsrail ilə münasibətləri normallaşdırmaq müqabilində istədiyi tam hüquqlu müdafiə müqaviləsi təşkil etməyəcək.

Agentlik qeyd edir ki, müdafiə müqaviləsinin bir hissəsi olaraq ABŞ həmçinin Səudiyyə Ərəbistanına Amerika silahlarının satışını sürətləndirməyi və krallığa qabaqcıl müdafiə texnologiyalarının tədarükündəki maneələri aradan qaldırmağı planlaşdırır. Lakin Səudiyyə Ərəbistanı müqaviləyə sənədin daha əhatəli müdafiə müqaviləsinə çevrilməsinə imkan verəcək bir bəndin daxil edilməsində israr edir.