Türkiyə 300 metr uzunluğunda təyyarədaşıyan gəminin inşasına başladı

"Türkiyə "TCG Anadolu"nun böyük versiyası olacaq 300 metr uzunluğunda təyyarədaşıyan gəminin tikintisinə başlayıb".

Ölkə Prezidenti Rəcəb Tayyib Ərdoğan bunu İstanbul Hərbi Dəniz Gəmiqayırma Zavodunda dəniz platformalarının istismara verilməsi mərasimində deyib.

Onun sözlərinə görə, havada güclü və dənizdə təsirli olmadan quruda çəkindirici qüvvə olmaq mümkün deyil.

Türkiyə dövlət başçısı qeyd edib ki, ölkəsi tədqiqat və inkişafdan dizayna, proqram təminatından seriyalı istehsala qədər bütün prosesləri öz milli resurslarından istifadə edərək həyata keçirir. O, Türkiyənin dünyada müstəqil şəkildə hərbi gəmilər hazırlayan və suya buraxan 10 ölkə arasında olduğunu vurğulayıb.