Rusiya Ukraynanın hökumət binasına zərbə endirdi – gərginlik artır

Rusiya Ukraynanın hökumət binasına zərbə endirdi – gərginlik artır

News365.az xəbər verir ki, Rusiya ordusu gecə saatlarında Ukraynaya qarşı genişmiqyaslı dron hücumu həyata keçirib. Bu dəfə hücumun əsas hədəfi Kiyevin mərkəzində yerləşən hökumət binası olub.

Ukraynanın Baş naziri Yuliya Svırıdenko açıqlamasında bildirib ki, binanın damı və yuxarı mərtəbələri ciddi zədələnib, əraziyə xilasedicilər və yanğınsöndürmə helikopterləri cəlb edilib. O, həmçinin Qərb ölkələrini Rusiyaya qarşı sanksiyaları, xüsusilə enerji sahəsində məhdudiyyətləri daha da sərtləşdirməyə çağırıb.

Prezident Volodimir Zelenski isə son statistikanı paylaşaraq deyib ki, yalnız sentyabrın əvvəlindən bəri Rusiya Ukraynaya qarşı 1300-dən çox dron və 900-ə yaxın idarə olunan bomba istifadə edib. Onun sözlərinə görə, bu, Moskvanın ardıcıl təzyiq siyasətini göstərir.

Diplomatik müstəvidə isə tərəflərin açıqlamaları diqqət çəkib. Zelenski “ABC News”a müsahibəsində yalnız Rusiya ərazisindən kənarda görüşə hazır olduğunu, amma istənilən formatda danışıqlara açıq qaldığını vurğulayıb. Vladimir Putin isə Şərq İqtisadi Forumunda Kiyevin mövqeyinə cavab olaraq Zelenskini Moskvaya dəvət edib və təhlükəsizliyinə zəmanət verəcəyini bəyan edib.

Hərbi eskalasiyanın fonunda tərəflərin bu ziddiyyətli açıqlamaları Moskva-Kiyev xəttində diplomatik prosesin daha da mürəkkəbləşəcəyindən xəbər verir. Müşahidəçilər hesab edirlər ki, ABŞ və Qərbin reaksiyası danışıqların taleyini müəyyən edəcək əsas faktor olacaq.

News365.az