“Mənim küçəmdə” layihəsi Bakıya gəlir?

Bir müddət öncə Atatürk parkında bəzi vətəndaşların yedikləri tumun qabığını yerə atması ilə bağlı status paylaşmışdım. Bundan sonra araşdırdım ki, dünyanın müxtəlif ölkələrində bu cür hallarla necə mübarizə aparılır, innovativ həllər hansılardır. Nümunələr çox olsa da, diqqətimi ən çox Parisdə tətbiq edilən dansmarue (“Mənim küçəmdə”) layihəsi cəlb etdi.

Bu mobil platforma vasitəsilə insanlar dolmuş zibil qutuları, ərazidə daşqın, dirək və ağacların aşması kimi gündəlik sosial insidentlər barədə operativ məlumat paylaşa bilirlər. Hər müraciətə mütləq fotoşəkil əlavə olunur. Ardınca müvafiq dövlət qurumu problemi aradan qaldırır və nəticəni təsdiqləyən şəkli platformaya yükləyir,müraciətçinin öz sorğusunun statusunu açıq şəkildə izləmək imkanı yaranır.

Fikrimcə, Bakıda da belə bir platforma uğurlu ola bilər. Məsələn, Bakı Şəhər İcra Hakimiyyəti bu xidməti işə sala, digər aidiyyəti qurumları da prosesə cəlb edə bilər.Misal üçün, Azərişıq ASC, Azəriqaz İB,  AYNA, ADSEA və s. Vətəndaşların açıq müraciətinə dövlət qurumlarının açıq reaksiyası həm şəffaflıq yaradar, həm də qurumlar arasında sağlam rəqabət (reytinq yarışı) formalaşdırar. Nəticədə isə qazanan Bakı şəhəri və onun sakinləri olar.

Platformanın fəaliyyəti paytaxt sakinlərini şəhərin inkişafına cəlb edər, həm də onların şəbəkələşməsinə şərait yaradar. Vətəndaşlar üçün reytinq sistemi yaratmaq mümkündür; hər ilin sonunda “İlin aktiv vətəndaşı” nominasiyası üzrə seçilənləri mükafatlandırmaq da əlavə motivasiya verər. Belə bir platforma, ümumilikdə, vətəndaş məmnunluğunu əhəmiyyətli dərəcədə artırar.

Aqil Məmmədoc, News365.az