Məktəbli çantası neçə kiloqram olmalıdır?
Yeni tədris
ilinə sayılı günlər qalıb. Və ötən hər gün valideynlərin qayğılarını bir qədər
də artırır. Çünki yeni tədris ilinə hazırlıq məqsədi ilə valideynlər bəzən bir
dünya ləvazimat alırlar. Və bu ləvazimatlarla dolu çantaların daşınması da bir
başqa problemdir.
Mövzu ilə bağlı News365.az-a danışan
pediatr Vaqif Qarayev deyir ki, məktəbli çantalarının çəkisi çox ağır
olur:
“Hər ilin bu
vaxtı qızğın müzakirələr gedir. Oturuşmuş normalar var. İbtidai siniflərdə dərslik
və dərs ləvazimatları ilə dolu çantanın ağırlığı uşağın ümumi çəkisinin 10
faizi qədər olmalıdır. Məsələn, 1-ci sinif şagirdinin çantası 1,5-2 kq ağırlığında
olmalıdır.
Bu belədirmi?
Xeyr, belə deyil! Bəzi hallarda valideynlər ağır və allı-güllü çantalara üstünlük
verirlər. Əksər hallarda isə məktəb müxtəlif lazımsız vəsaitlərlə doldurur çantaları.
Hətta eyni məktəbin bir sinfində sanitar normalara əməl edilir, digərində isə hər
gün valideynə nəsə aldırırlar. Uşaqlarda qamət pozğunluğunun bir səbəbi də çəkisinə
uyğun olmayan ağır çantaları kürəyində daşımasıdır.
News365.az
