Marallar bu xəstəliyi yayır

ABŞ alimləri xroniki arıqlama xəstəliyinin (CWD) ağ quyruqlu marallar arasında yayılma mexanizmini daha dərindən öyrəniblər.

News365.az xəbər verir ki, tədqiqatın nəticələri Wildlife Monographs (WM) jurnalında dərc olunub.

Məlumata görə, Viskonsin ştatının cənub-qərbində 600-ə yaxın maralın GPS cihazları ilə izlənməsi nəticəsində, onların mövsümi davranışları və yaşayış yerləri ilə xəstəliyin yayılması arasındakı əlaqələr müəyyən edilib.

Tədqiqatlar göstərib ki, yay və payız aylarında maralların çirklənmiş torpaq və bitki örtüyü olan ərazilərdə daha çox vaxt keçirməsi, həmçinin payızda çoxalma dövründə heyvanlar arasında təmasların artması, xəstəliyin yayılma riskini artırır. Qış və yaz aylarında isə həm ətraf mühit, həm də yaxın ünsiyyət vasitəsilə yoluxma riski mövcuddur.

Araşdırmalar, kənd təsərrüfatı sahələri və otlaqların marallar üçün cəlbedici olduğunu və bu ərazilərin xəstəliyin bir qrup maraldan digərinə yayılmasını asanlaşdırdığını da ortaya qoyub.

Əldə olunan məlumatlar, xəstəliyin yayılma dinamikasını daha dəqiq proqnozlaşdırmağa və onun qarşısını almaq üçün effektiv tədbirlər hazırlamağa kömək edir.

Layihə, yerli hakimiyyət orqanları, bioloqlar, könüllülər və torpaq mülkiyyətçilərinin əməkdaşlığı sayəsində həyata keçirilib və gələcəkdə CWD-nin yayılmasına nəzarət etmək üçün yeni strategiyaların əsasını təşkil edə bilər.