Kremlin Ermənistan siyasəti: Yeni geosiyasi siqnallar
Cənubi Qafqazda geosiyasi proseslər yeni mərhələyə qədəm qoyur. Ermənistanda keçirilən parlament seçkilərindən sonra Rusiya tərəfindən səsləndirilən açıqlamalar Kremlin yalnız seçki nəticələrindən deyil, daha çox yaranan yeni siyasi reallıqdan narahat olduğunu göstərir.
News365.az xəbər verir ki, Moskvanın son bəyanatları İrəvan üzərində zəifləyən təsir imkanlarını bərpa etmək və Ermənistanın xarici siyasət kursunu öz maraqları çərçivəsində saxlamaq cəhdi kimi qiymətləndirilir. Rusiya rəsmilərinin seçki prosesi ilə bağlı irəli sürdüyü iddialar və müxalifətə təzyiqlərlə bağlı açıqlamalar isə bu fonda siyasi təzyiq elementləri kimi dəyərləndirilir.
Ekspertlərin fikrincə, Moskva üçün əsas məsələ seçkinin nəticələri deyil, Ermənistanın hansı geosiyasi istiqamətə yönəlməsidir. Bu baxımdan, Rusiya–Ermənistan münasibətlərində Avropa İttifaqı və Avrasiya İqtisadi Birliyi arasında seçim mövzusu daha da aktuallaşıb.
Xüsusilə Rusiya xarici işlər naziri Sergey Lavrovun səsləndirdiyi “seçimlərin müəyyənləşdirilməsi” ilə bağlı fikirlər İrəvana geosiyasi mesaj kimi şərh olunur. Bu bəyanatlar Kremlin Ermənistanın həm Qərblə yaxınlaşmasını, həm də Rusiya inteqrasiya strukturlarında qalmasını qəbul etmədiyini göstərir.
Eyni zamanda KTMT ilə bağlı maliyyə öhdəlikləri, enerji təhlükəsizliyi və iqtisadi əlaqələr kimi məsələlərin gündəmə gətirilməsi Moskvanın təsir alətləri kimi qiymətləndirilir. Ermənistan səfirinin Moskvaya çağırılması da bu gərginliyin tərkib hissəsi hesab olunur.
Siyasi müşahidəçilərə görə, Rusiya Ermənistan daxilindəki siyasi proseslərə də daha sərt yanaşmağa başlayıb. Müxalifətlə bağlı səsləndirilən fikirlər və ölkə daxilindəki siyasi gərginliklə bağlı açıqlamalar Kremlin mümkün ssenarilərinə işarə edir.
Analitiklər bildirirlər ki, Moskva Paşinyan hökumətinin güclənməsini Ermənistanın xarici siyasət kursunun dəyişməsi riskini artıran amil kimi görür. Bu səbəbdən daxili siyasi balansın dəyişdirilməsi və müxalifətin aktivləşdirilməsi ehtimalları da gündəmdə saxlanılır.
Bütün bu proseslər fonunda Rusiya üçün Ermənistan təkcə bir müttəfiq deyil, həm də Cənubi Qafqazda təsir imkanlarının əsas dayaqlarından biri kimi qiymətləndirilir. Bu isə regionda geosiyasi rəqabətin daha da kəskinləşdiyini göstərir.
Müşahidəçilərin fikrincə, Moskvanın sülh prosesi ilə bağlı mövqeyi də öz maraqlarına uyğun formalaşır. Kreml regionda tam həll olunmuş deyil, idarəolunan münaqişə mühitinin saxlanılmasında maraqlıdır.
Bu kontekstdə Ermənistan ətrafında baş verən proseslər təkcə İrəvanın deyil, bütövlükdə Cənubi Qafqazın gələcək geosiyasi düzəninin formalaşması baxımından həlledici əhəmiyyət daşıyır.
News365.az
