İsmayıllı rayonuna infotur təşkil edilib -FOTOLAR

“Şəfəq” Ekoturizm ictimai birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra edilən “Kənd yerlərində aqroturizmin təbliği” layihəsi çərçivəsində 27 və 28 iyun 2026-cı il tarixində İsmayıllı rayonuna İnfotur təşkil edilib.

İnfotur proqramında xüsusi müraciət forması əsasında müəyyən edilmiş Turizm şirkətlərinin nümayəndələri, QHT təmsilçiləri və müxtəlif sahələrdə çalışan təbliğat prosesinə töhfə verə bilən ümumilikdə 20 nəfər iştirakçı təmsil olunub.

Infoturun birinci günü layihənin məqsədi, hədəfləri, aqroturizmin inkişaf prespektivləri, infoturun proqramı ilə bağlı birliyin prezidenti, layihə rəhbəri Vamiq Babayev tərəfindən geniş məlumat verilib. Daha sonra proqrama uyğun rus-malakan icmasının kompakt yaşadığı yaşayış məntəqələrindən biri olan İsmayıllı rayonun İvanovka kəndinə səfər edilib. Səfər çərçivəsində kənddə arıçılıq, bağçılıq, heyvandarlıq, şərab istehsalı məşğul olan Andrey Antifeyev ilə görüş keçirilib. O, məşğul olduğu kənd təsərrüfatı məhsulları ilə bağlı geniş, maraqlı məlumatlar verib və əyani tanışlıq üçün imkanlar yaradıb. O, həmçinin iştirakçıları malakan mətbəx mədəniyyəti ilə tanış edib. Növbəti görüş isə kənddə fəaliyyət göstərən Qədim Məkan adlanan ev muzeyində keçirilib. Muzeyin təsisçisi Qurban Məmmədov uzun illər ərzində böyük marqala topladığı çox saylı qədim kənd təsərrüfatı alətlərini, müxtəlif məişət əşyaları, dəyərli tarixi eksponatları haqqında geniş məlumat verib və şəxsi təşəbbüslə yaradılan məkanın kəndin, o cümlədən rayonun tarixinin, mədəni irsinin, məişətinin gələcək nəsillər üçün əhəmiyyətini vurğulayıb.

İnfoturun ikinci günü İsmayıllı kənd təsərrüfatı məhsullarının satış bazarına getdikdən sonra rayonun Təzəkənd kəndində fəaliyyət göstərən Lakeside Garden aqroturizm təsərrüfatına səfər edilib. Təsərrüfatın rəhbəri Natiq Alızadə tərəfindən aqroturizm həyata keçirdiyi fəaliyyətlər, o cümlədən düşərgələr, festivallar, təşkil edilən musiqi və kino gecələri, balıqçılıq, heyvandarlıq, quşçuluq, bağçılıq haqqında geniş məlumat verilib və əyani tanışlıq üçün şərait yaradılıb. Yekunda iştirakçılar Basqal qəsəbəsində olub və Basqal Tarix-Mədəniyyət Qoruğunun direktoru Ceyhun İsmayılov tərəfindən ərazinin tarixi-mədəni irsi, adət-ənənələri, sənətkarlığı və geniş turizm imkanları haqqında məlumatlanıb. Sonra ərazidə tur şəkil edilib və tarixi-mədəni irs nümunələri, o cümlədən XVI-XVII əsrə aid Basqal Hamam Muzeyi ziyarət edilib. 

Tədbirin sonunda iştirakçılar infotur proqramının onlar üçün maraqlı olduğunu, eyni zamanda kənd əhalisi üçün əhəmiyyətini qeyd edib və aqroturizm fəaliyyətinin inkişafında layihə məqsədlərinə çatmaq üçün imkanları daxilində müvafiq təbliğat dəstəyinin verilməsində iştirak edəcəklərini bildiriblər.

Qeyd edək ki, layihənin məqsədi kənd təsərrüfatı potensialının turizm imkanları ilə inteqrasiyasını təmin etməklə, kənd yerlərində dayanıqlı iqtisadi inkişafı, yerli icmaların məşğulluğunu və gəlir səviyyəsini artırmaqdır.