Hərbi İdarəetmə İnstitutunun dinləyiciləri Mülki müdafiə qoşunlarında olublar

Fövqəladə Hallar Nazirliyinin Mülki müdafiə qoşunlarının (MMQ) komandanlığında Müdafiə Nazirliyinin Milli Müdafiə Universitetinin tabeliyində fəaliyyət göstərən Hərbi İdarəetmə İnstitutunun Strateji araşdırmalar və dövlət müdafiəsi idarəetmə akademik kursunun dinləyiciləri ilə görüş təşkil olunub.

FHN-dən News365.az-a verilən xəbərə görə, kursun tədris proqramına uyğun olaraq keçirilən tədbirin məqsədi dinləyicilərin fövqəladə halların qarşısının alınması və nəticələrinin aradan qaldırılmasında MMQ-nin rolu, şəxsi heyətinin hazırlığı və texniki təminatı barədə məlumatlandırılması olub.

Tədbirin əvvəlində Mülki müdafiə qoşunlarının komandanlığında Ümummilli Lider Heydər Əliyevin büstü ziyarət edilib, daha sonra qonaqlar Heydər Əliyev Muzeyində Ülu Öndərin həyat və fəaliyyətini əks etdirən çoxsaylı foto-ekspozisiya ilə tanış olublar.

Tədbir çərçivəsində Mülki müdafiə qoşunlarının və Böhran Vəziyyətlərində İdarəetmə Mərkəzinin fəaliyyəti haqqında təqdimat keçirilib, xüsusi təyinatlı texnikalara, yanğın-texniki və xilasedici avadanlıqlara baxış keçirilib, qarşılıqlı fikir mübadiləsi aparılıb və dinləyicilərin sualları cavablandırılıb.

Sonda xatirə şəkli çəkdirilib.