Həmrəylik: Birlikdən doğan güc

     Biz tez-tez özümüzə sual veririk: dünya azərbaycanlılarını bir araya gətirən nədir? Fərqli ölkələr, fərqli dillər, fərqli həyat tərzləri… Amma buna baxmayaraq, bizi tək bir məqsəd ətrafında birləşdirən güclü bir bağ var: Həmrəylik! Hər il dekabrın 31-də biz gənclər bu bağın dəyərini daha dərindən hiss edirik. Bu gün bizim üçün sadəcə bir bayram deyil, milli ruhun zəfər çaldığı gündür. Bu həmrəylik ruhunu əsası Ümummilli lider Heydər Əliyev tərəfindən qoyulan, bu gün də cənab prezident İlham Əliyevin uğurla davam etdirdiyi siyasətdə tapırıq.

     Ulu Öndər Heydər Əliyev həmişə vurğulayıb ki, “Xalq yalnız birlik və həmrəylik içində güclüdür.” Bu fikrin mahiyyəti çox dərindir. XX əsrin sonlarında Sovet İttifaqının dağılma prosesləri baş verərkən, dünyanın müxtəlif guşələrinə səpələnmiş milyonlarla azərbaycanlı tarixi əlaqələrini itirmək təhlükəsi ilə üz-üzə qalmışdı. Məhz həmin dönəmdə Ulu Öndər Heydər Əliyev böyük uzaqgörənlik nümayiş etdirərək, dünya azərbaycanlılarını vahid ideya ətrafında birləşdirmək təşəbbüsü ilə çıxış etdi. Bu ideya Həmrəylik Gününü yaratmaqla öz praktiki ifadəsini tapdı və bu gün hər bir azərbaycanlı üçün milli qürur mənbəyidir.

      Biz gənclər Ümummilli liderHeydər Əliyevin irsini yalnız tarixi yaddaş kimi deyil, gələcəyə baxışımızın əsas istiqaməti kimi qəbul edirik. Onun ideyaları bizə öyrədir ki, kökümüzdən qopmadan, müasir dünyada öz yerimizi qorumalıyıq.

      Cənab İlham Əliyev isə Ulu Öndərin başladığı bu milli missiyanı qətiyyətlə davam etdirir. O deyir: “Azərbaycanın qüdrəti yalnız onun sərhədləri daxilində deyil, xaricdə yaşayan hər bir azərbaycanlının iradəsi və milli mənsubiyyətini qoruması ilə ölçülür.” Bu, bir daha göstərir ki, dünya azərbaycanlılarının həmrəyliyi təkcə emosional deyil, həm də siyasi və mədəni gücdür.

     Ulu Öndər Heydər Əliyevin “Mən fəxr edirəm ki, azərbaycanlıyam!” sözləri biz gənclərin həyatında bir şüara çevrilib. Biz də fəxr edirik ki, belə zəngin tarixə, güclü lidere və vətənpərvər xalqa sahibik. Həmrəylik bizim üçün sadəcə bir ideya deyil – bu, gələcəyə baxışımızdır!

     Ümummilli lider Heydər Əliyev Dünya Azərbaycanlılarının Həmrəylik Gününün yaranmasının təşəbbüskarı olaraq bu bayramın əsas mahiyyətini belə ifadə edirdi:“Biz hamımız – dünyanın harasında yaşamağımızdan asılı olmayaraq – azərbaycanlıyıq. Bizim gücümüz birlikdədir. Xalqımızın parlaq gələcəyi bu həmrəyliyə bağlıdır.”Onun uzaqgörən siyasəti sayəsində dünya azərbaycanlılarının vahid milli maraqlar ətrafında birləşməsi üçün ilkin əsaslar yaradıldı. O, xaricdə yaşayan soydaşlarımızın Azərbaycan dövlətçiliyini, milli dəyərlərimizi və mədəniyyətimizi qorumasını xüsusi əhəmiyyətli vəzifə kimi görürdü.

     Cənab Prezident İlham Əliyev Ulu Öndərin irsini qətiyyətlə davam etdirərək, Dünya Azərbaycanlılarının Həmrəylik Gününün əhəmiyyətini həm milli, həm də beynəlxalq səviyyədə artırdı. O vurğulayıb:“Dünya azərbaycanlılarının həmrəyliyi bizim milli gücümüzün göstəricisidir. Həmrəyliyimiz bizi bir millət kimi daha da möhkəmləndirir və gələcəyimizə inamla baxmağa imkan verir.” Prezident İlham Əliyevin rəhbərliyi ilə Azərbaycan diasporunun fəaliyyəti daha da genişləndirildi. Dünya Azərbaycanlılarının Qurultaylarının keçirilməsi, diaspor təşkilatlarının fəaliyyətinin gücləndirilməsi və beynəlxalq arenada Azərbaycanın mövqeyinin möhkəmləndirilməsi bu siyasətin əsas nailiyyətləridir. Prezident İlham Əliyev bildirir ki, xaricdə yaşayan soydaşlarımızın milli maraqları qorumaları və Azərbaycanla əlaqələrini gücləndirmələri milli həmrəyliyimizin əsas sütunlarından biridir:“Dünya azərbaycanlılarının gücü birlikdədir. Azərbaycan Respublikasının müstəqilliyi və uğurları hər bir azərbaycanlının qürur mənbəyidir.”

      Prezident İlham Əliyev vurğulayır ki, dünyanın harasında yaşamamızdan asılı olmayaraq, bizi bir millət edən Azərbaycançılıq ruhudur:“Dünya azərbaycanlılarının həmrəyliyi bizim milli gücümüzün əsas göstəricisidir. Bu birlik bizi daha da güclü edir və qarşıda duran hədəflərə çatmağımızı təmin edir.”Bu fikir biz gənclərə həmrəylik anlayışını təkcə tarixdən gələn dəyər  deyil, gələcəyimiz üçün mühüm bir prinsip kimi öyrədir.  Prezident İlham Əliyevin nitqində biz gənclər üçün verilən əsas mesajlardan biri də budur: hər bir azərbaycanlı yaşadığı ölkədə Vətənini təmsil etməli, milli maraqları müdafiə etməli və Azərbaycan adına layiqli vətəndaş olmalıdır.

    Prezident İlham Əliyev xaricdə yaşayan soydaşlarımızın həmrəyliyini Azərbaycan dövlətçiliyinin möhkəmlənməsində əsas faktor kimi qiymətləndirir:“Azərbaycan diasporu həmrəyliyimizin əsas sütunlarından biridir. Bu birlik beynəlxalq səviyyədə ölkəmizin maraqlarını müdafiə etməyə imkan yaradır.”Bu fikir mühüm bir mesajdır: fərqli ölkələrdə yaşasaq belə, diaspor təşkilatları vasitəsilə birliyimizi nümayiş etdirməli, Azərbaycan adını dünyada ucalara qaldırmalıyıq. Prezident İlham Əliyevin nitqləri bizə bir həqiqəti xatırladır: birlik bizim kimliyimizin təməlidir. Hər birimiz yaşadığımız ölkədən asılı olmayaraq, Azərbaycançılıq ideyasını yaşatmalı, həmrəyliyi gündəlik həyatımızda hiss etməli və onu ətrafımıza yaymalıyıq.    

    2024-cü ilin 25 dekabrı. Soyuq qış günü, amma daha soyuq bir xəbər ölkəmizi dərin yasa qərq etdi. Azərbaycan Hava Yollarına məxsus J2–8243 nömrəli Bakı–Qroznı reysini yerinə yetirən “Embraer E190AR” təyyarəsi Qazaxıstanın Aktau şəhəri yaxınlığında məcburi eniş cəhdi zamanı qəzaya uğradı. Xəzər dənizi üzərindən “SOS” siqnalı göndərilən an, yalnız o təyyarədəki 62 sərnişin və 5 ekipaj üzvü üçün deyil, bütün Azərbaycan üçün zaman dayandı. Faciənin miqyası dəhşətli idi. Təyyarədəki insanların taleyi millətin gözləri önündə qaranlığa qərq oldu. Dekabrın 26-da Azərbaycanda matəm elan edildi. Bütün ölkə dərd içində birləşdi, insanların duaları səmaya yüksəldi.

   Moskva, İstanbul, New York, Berlin, London, Dubay – harada bir azərbaycanlı vardısa, bu xəbər onların evində işıqları söndürdü. Sosial media platformalarında həmrəyliyin misilsiz təzahürünü görmək mümkün idi. Xaricdə yaşayan azərbaycanlılar matəm dolu mesajlarla qəzada həlak olanların xatirəsini anır, ailələrə təsəlli verməyə çalışırdılar. Bu hadisə ilə bağlı ən təsirli nüans isə bir çox xarici ölkələrdə yaşayan azərbaycanlıların bu ağrını yalnız öz ölkələrinin dərdi deyil, yaşadıqları toplumun dərdi kimi qəbul etməsi oldu. Xarici dövlətlərin rəhbərlərinə müraciət edən diaspor liderləri faciə ilə bağlı dəstək çağırışları etdilər. Xüsusilə, Qazaxıstanda yaşayan soydaşlarımız yaralıların tibbi yardımı və ailələrinin məlumatlandırılması üçün orada dayanmadan çalışdılar. Bu qəzada dünyadakı azərbaycanlılar bir daha sübut etdilər ki, məsafələr ürəkləri ayıra bilmir. Faciə Azərbaycan xalqının yalnız coğrafi sərhədlər daxilində deyil, bütün dünyada necə böyük bir ailə kimi yaşadığını göstərdi. Harada yaşamasından asılı olmayaraq, hər bir azərbaycanlı bu dərdi öz ağrısı, hər bir itkini öz itkisi kimi qəbul etdi.

     Bu birliyi, sevgini və həmrəyliyi görəndə anlayırsan ki, millətimizin gücü təkcə Vətən torpağında deyil, onun hər bir övladının ürəyindədir. Və bu ürək, dünyanın hansı nöqtəsində olursa olsun, həmişə Vətənin döyünən ürəyi ilə birgədir.

Məryəm Bağırova,  ADU-nun 2-ci kurs tələbəsi