Emosional dözümlülüyü artıran 5 ifadə: Psixoterapevtdən həyatı dəyişəcək tövsiyələr
Münasibətlər üzrə tanınmış psixoterapevt Terri Koul illüstrator Keyti (Katie's Self Care Diaries) və həyat kouçu Din Stottun təqdim etdiyi 5 mühüm ifadəyə diqqət çəkib. “YourTango” nəşrinin yaydığı məlumata görə, bu fikirlər həyatın mürəkkəb mərhələlərindən keçən şəxslərin psixoloji dözümlülüyünü bərpa etməyə kömək edə bilər.
Psixoloqlar və tədqiqatçılar çətin günlərdə motivasiyanı qorumaq üçün bu 5 prinsipi mütəmadi olaraq xatırlamağı məsləhət görürlər:
1. “Sən artıq böyük sınaqlardan keçmisən – düşündüyündən daha güclüsən”
Krizis anlarında insanlar adətən keçmiş uğurlarını və maneələri necə aşdıqlarını unudurlar. "Walden University" ekspertləri bildirir ki, insanın öz keçmiş təcrübəsinə söykənməsi, özünə qarşı mərhəmətli olması və minnətdarlıq hissini inkişaf etdirməsi özünəinamı yenidən formalaşdırır.
2. “Sənin varlığın belə bir çoxları üçün dəyərlidir”
Özünü tənhalığa qapamaq stresin təsirini artırır. Araşdırmalar göstərir ki, yaxın çevrədən alınan sosial dəstək və sevdiklərinin varlığını hiss etmək psixoloji sabitliyi bərpa edir, stress səviyyəsini əhəmiyyətli dərəcədə azaldır.
3. “Başqalarının düşüncələrinin həyatını idarə etməsinə imkan vermə”
Ətrafdakıların gözləntilərini qarşılamağa çalışmaq şəxsi dəyərlərin itirilməsinə gətirib çıxarır. Mütəxəssislərin fikrincə, hər kəsi razı salmaq cəhdindən imtina edib öz ehtiyaclarına köklənmək emosional müstəqilliyin əsasıdır.
4. “Bəzən istəyinə çatmamaq ən böyük şansdır”
Planların pozulması və uğursuzluqlar ilk baxışda məyusluq yaratsa da, tez-tez daha yaxşı imkanların qapısını açır. "Johns Hopkins Medicine" mütəxəssisləri qeyd edirlər ki, bu cür nikbin düşüncə tərzi həyatdan alınan məmnunluğu artırır və fiziki sağlamlığa da müsbət təsir edir.
5. “Heç nə əbədi deyil – keçirdiyin bu hisslər də gəlib-gedəcək”
Mənfi emosiyaların müvəqqəti olduğunu dərk etmək ümidi diri tutur. Klinik psixoloq Andrea Bonior vurğulayır ki, hadisələri yalnız “tam yaxşı” və ya “tam pis” kimi qiymətləndirməkdən çəkinmək, hisslərin keçici olduğunu qəbul etmək təşviş səviyyəsini minimuma endirir.
