CHP Qərbə “ yaxşı oğlan” kimi görünmək üçün Türk dünyasından imtina edir- SENSASİON DETALLAR

Növbəti qurultayına hazırlaşan Türkiyənin Cümhuriyyət Halk Partisi bu günlərdə özünün yeni seçki proqramlarını təqdim edib. Dörd (https://program.chp.org.tr/ )ayrı sahəni əhatə edən proqramlar içərisində “Dış Politika, Güvenlik ve Dirençlilik” başlığı ilə olanı oxudum. “Yurtta sülh – cihanda sülh” konsepsiyasına qayıdacağını bəyan edən CHP əsas istiqamətinin Avropa Birliyi və NATO olacağını bildirir.

Geniş həcmli sənəddə Türkiyənin Qafqaz, Mərkəzi Asiya və TDT ilə əməkdaşlıq istiqamətlərinə ötəri yanaşılır. Görünən odur ki, CHP xarici siyasətdə Türkiyənin aktiv hücum diplomatiyasından müdafiə diplomatiyasına keçidi hədəfləyir. Aİ və NATO ilə əməkdaşlığın dərinləşdirilməsi barədə bəyanat da bunun göstəricisidir. Çünki Aİ üzvlüyünü hədəfləyən hər bir ölkə ilk növbədə Brüsselin direktivlərini yerinə yetirməlidir.

Sənəddə KKTC ilə əlaqələr barədə müəyyən istiqamətlər qeyd edilsə də, Azərbaycan və Mərkəzi Asiya ölkələri ilə strateji tərəfdaşlığın konturları barədə məlumat verilmir. Görünən odur ki, CHP Qafqazı və Mərkəzi Asiyanı yalnız bir region, türk dövlətlərini isə bu regionun kiçik bir parçası kimi görür.

Nəzərə alsaq ki, Avropa İttifaqı və ABŞ regionla bağlı siyasətlərində Azərbaycan və Mərkəzi Asiya ölkələri ilə əlaqələrin dərinləşdirilməsini hədəfləyir, Avropa Azərbaycanın Mərkəzi Asiyaya açılan əsas qapı və Xəzərin resurslarını Avropanın enerji təhlükəsizliyi arxitekturasında əsas mənbə kimi qiymətləndirir, onda CHP-nin açıqladığı bu sənədin icrasının elə Türkiyənin milli və regional maraqlarına birbaşa zərbə olduğu görünür.

Yəni Avropa İttifaqına “yaxşı oğlan” kimi görünmək üçün CHP Qafqazda və Mərkəzi Asiyada Türkiyənin milli maraqlarından imtina etməyə, Azərbaycanla formalaşmış strateji tərəfdaşlığı zəiflətməyə meyilli təsir bağışlayır.

Aqil Məmmədov, politoloq