“Araz supermarket”dən daha bir ŞİKAYƏT

“Araz supermarket”dən şikayətlər bitmir, tükənmir. Şikayətlərin çoxu da vitrindəki qiymətlə, kassadakı qiymətlərin fərqindəndir. Vətəndaşlar iddia edirlər ki, bu ticarət şəbəkəsi insanları endirim adı ilə aldadaraq ciblərə girir.

News365.az xəbər verir bu dəfəki şikayətçi Elnurə Abışovadır. O bu barədə özünün sosial səhifəsində yazıb:

“Bayaq yolüstü “Araz supermarket”ə döndüm, əslində 1-2 ərzaq alacaqdım. Üstündə endirim sarı kağızlar diqqətimi cəlb etdi, bir də baxdım, 76 manatı keçib. Gəlib evdə baxıram çekə, endirim nə gəzir…

Ordakılar dostlardır, mənim də ən çox alış-veriş məkanımdır. Statusu tənqid yox, tam səmimi yazmışam.

Arazçı dostlarım, endirim bitibsə kağızları niyə götürmürsüz? Aldadırsız axı….

Bitməyibsə niyə kassada sarı kağıza yazdığınız qiymət vurulmur?

Zəng etməyin, cavabı rəyə yazın mənimkimilər maariflənsin. Mən tək deyiləm bu halla üzləşən hər halda”.

Göründüyü kimi kampaniya adı ilə istehlakçılar həvəsləndirilir. Son nəticədə isə aldadılır. Ən pisi də odur ki, faktı sübut edəndə rəhbərlik fəhlələri günahlandırırlar. Guya ki, onlar vaxtında qiymət kağızını dəyişməyiblər.

Təbii ki, bir çox insanlar da həmin fəhlələrin işdən qovulmaması üçün susurlar.

Nəticədə, “Araz supermarket” öz oyunlarını davam etdirir.

News365.az