Dekabr ayının 14-də Azərbaycan Respublikası Atçılıq Federasiyası tərəfindən ənənəvi olaraq təşkil edilən çövkən üzrə 11-ci Prezident Kubokunun mətbuat konfransı və püşkatma mərasimi keçirilmişdir.
Federasiyanın Baş katibi Bəhruz Nəbiyev çıxışında ötən mövsüm Peşəkar Çövkən Liqasının (PÇL) nəticələrindən bəhs etmiş, transfer pəncərəsinin açılması barədə məlumat verərək 2025-ci ildə tətbiq ediləcək yeniliklərdən danışmışdır.
Mətbuat konfransının növbəti hissəsində Prezident Kubokunun püşkatma mərasimi keçirilmişdir.
8 komanda 4 güc səbətinə bölünən püşkatmanın nəticəsi:
A qrupu: Sərhədçi, Zəfər, Embawood, Şirvan
B qrupu: Polad, Omar, Elit, Köhlən
Məlumat üçün bildirək ki, Prezident Kubokunun ilk oyunlarına 16 dekabr 2024-cü il tarixində Binə Atçılıq Mərkəzinin qapalı meydanında start veriləcək. Qrup mərhələsi 16, 18 və 20 dekabr tarixlərində keçiriləcək və hər gün saat 15:00-da dörd oyun oynanılacaq.
23 dekabr saat 15:00-da yarımfinal görüşləri, 24 dekabr saat 19:00-da üçüncülük uğrunda, saat 20:00-da isə final qarşılaşması keçiriləcək.
Qeyd edək ki, bütün oyunlar CBC Sport kanalı vasitəsilə canlı yayımlanacaq.
Azərbaycan Respublikası Atçılıq Federasiyası