"Zəngəzur dəhlizinə ABŞ-ın nəzarət edəcəyi feyk xəbərdir" - Millət vəkili

Ermənistan hökuməti Azərbaycanın əsas hissəsini Naxçıvanla birləşdirmək üçün nəzərdə tutulan Zəngəzur dəhlizinə nəzarəti ABŞ-a verməyə razılaşıb.

Bu barədə İspaniyanın “Periodista Digital” nəşri İrəvan və ABŞ arasında “gizli memorandum”un məzmununa istinadən məlumat yayıb.

Məlumata görə, sənəd Ermənistanın Zəngəzur rayonu ərazisindən keçməklə Azərbaycanı Naxçıvanla birləşdirəcək 42 kilometr uzunluğunda nəqliyyat dəhlizinin yaradılmasını nəzərdə tutur:

“Bu marşruta müvəqqəti “Tramp körpüsü” adı verilib. Nəqliyyat dəhlizi özəl Amerika şirkəti tərəfindən idarə olunacaq. Marşrutdan istifadədən İrəvan gəlirin cəmi 30%-ni alacaq”.

Nəşr iddia edib ki, memorandum artıq Ermənistan, Azərbaycan və ABŞ tərəfindən təsdiqlənib:

“Memorandumda həmçinin Ermənistan ərazisinə ABŞ-ın əhəmiyyətli qüvvələrinin yerləşdirilməsi də nəzərdə tutulub. Lakin söhbət nizami ordudan yox, 1000-ə yaxın döyüşçüdən ibarət özəl hərbi şirkətdən gedir. Bu qüvvələr dəhlizin təhlükəsizliyini təmin edəcək”.

Mövzu ilə bağlı  News365.az- a danışan Millət vəkili Rasim Musabəyov deyib ki, hər hansı bir memorandumdan söhbət gedə bilməz:

“ABŞ Ermənistanla bu barədə danışıqlar belə aparmayıb. Bu kimlərinsə fikirləridir. Publika üçün səsləndirirlər. Reallıqsa budur ki, sözü gedən ərazidə hal-hazırda rus sərhədçiləri durub. Bu xəbər yayılandan sonra Ermənistanın təhlükəsizlik şurasının katibi İran rəsmilərinə zəng edərək bildirib ki, narahatçılığa əsas yoxdur,qeyri-ciddi söhbətlərdir. Təbii ki, Paşinyan da boş dayanmayıb, Rusiyanı inandırmağa gedir. Ona görə də belə xəbərlərin əsası yoxdur. Guya ABŞ 99 il müddətində Zəngəzur dəhlizinin mühafizəsini təşkil edəcək. Hətta Zəngəzur dəhlizini “Tramp körpüsü” adlandıranlar da var. Bunlar hələki əsası olmayan boş söhbətlərdir.

Nəzərə alaq ki, dəhlizin mühafizəsindən əvvəl onun inşası vacibdir. Hələliksə dəhlizin inşası barədə Ermənistan hökümətinin hansısa bir layihəsi yoxdur. Baxmayaraq ki, rəsmi İrəvan yayılan feyk xəbərləri təkzib etmir. Bu da onunla bağlıdır ki, belə xəbərlər onların işinə yarayır. Paşinyan höküməti hər vasitə ilə Zəngəzur dəhlizinin açılmasını ertələyir. Belə vəziyyətdə isə bu tip informasiyaların yayılması təsadüfi deyil”.

News365.az