“WhatsApp”dan maraqlı YENİLİK – “Dost”unuzu yarada biləcəksiniz

“WhatsApp” istifadəçilərə proqram daxilində heç bir kod yazmadan öz süni intellekt dostlarını yaratmağa imkan verəcək.

News365.az xarici mətbuata istinadən xəbər verir ki, bu addım istifadəçilərə asanlıqla OpenAI-nin fərdiləşdirilmiş GPT-lərinə və Google-un Gemini Gems xüsusiyyətlərinə bənzər öz rəqəmsal köməkçilərini yaratmağa imkan vermək məqsədi daşıyır.

Yeni alət Meta-nın daha geniş "AI Studio" platformasının bir hissəsidir. “WhatsApp”dakı bu imkanlarla istifadəçilər mesajlaşma proqramından çıxmadan öz süni köməkçilərini yarada və fərdiləşdirə biləcəklər.

Necə istifadə edilir?

Bu funksiya hazırda Android və iOS əməliyyat sistemlərində məhdud sayda istifadəçilərlə sınaqdan keçirilir. Meta bu xüsusiyyəti sınaqdan keçirdikdən sonra bütün istifadəçilərə təqdim etməyi hədəfləyir. Bildirilir ki, istifadəçi “dost”unu yaratmaq üçün süni intellektin oynayacağı rolu seçməyi xahiş etməklə başlayır. Məsələn, köməkçi müəllim, səyahət planlayıcısı və ya komik virtual dost.

İstifadəçi daha sonra “dost”un şəxsiyyət tərzini müəyyənləşdirir. Sakit və düşüncəlidən tutmuş enerjili və yumoristik, hətta rəsmi və ya məlumatlandırıcı keyfiyyətlər üçün bir çox variant var. 

Aramıza süni dostlar girəcək

Hər bir “dost” əvvəlcə şəxsi olaraq qalacaq, lakin istifadəçilər istəsələr, onları xüsusi link vasitəsilə başqaları ilə paylaşa biləcəklər. Bu üsulla istifadəçilər bir-birinin “dost”larını nəzərdən keçirəcək və qarşılıqlı əlaqələr quracaqlar.

Meta bu prosesi “WhatsApp”da çox sadə və əlçatan etməyi planlaşdırır.