Tənbəllik: Beyindən gələn siqnal

London Universitet Kollecində (UCL) aparılan yeni bir araşdırma tənbəllik anlayışına elmi baxış gətirib.

News365.az xəbər verir ki, araşdırma “Nature Human Behaviour” jurnalında dərc olunub.

Alimlər müəyyən ediblər ki, insanların "tənbəl" adlandırdığı davranışlar əslində beynin enerji qənaəti mexanizmasından qaynaqlanır.

Tədqiqat çərçivəsində iştirakçılara həm fiziki, həm də zehni güc tələb edən müxtəlif tapşırıqlar verilib və bu zaman onların beyin fəaliyyətləri funksional MRT (maqnit-rezonans tomoqrafiyası) ilə izlənilib. Nəticələr göstərib ki, daha az fəaliyyət göstərməyi seçən insanların beyninin ön singulat korteks adlı sahəsində enerji qənaətinə yönəlmiş aktivlik müşahidə olunur.

Baş tədqiqatçı Dr. Helena Brooks bildirib: “Tənbəllik çox vaxt mənfi qiymətləndirilir, amma bizim araşdırmamız göstərdi ki, bu, bədənin özünü qoruma və enerji saxlama mexanizması ola bilər. Bu mexanizm min illərlə əvvəl sağ qalmaq üçün vacib idi, lakin müasir dövrdə həyat tərzimiz dəyişsə də, beyin bu köhnə reflekslərlə işləməyə davam edir”.

Alimlər bu kəşfin gələcəkdə motivasiya problemi, depressiya və ADHD (diqqət çatışmazlığı və hiperaktivlik) kimi hallar üçün müalicə və dəstək proqramlarının hazırlanmasında mühüm rol oynayacağını düşünür.