“Sertifikasiya sualları əvvəlcədən ötürülüb: Bu, cinayətdir” Etibar Əliyev

Təhsil eksperti və ictimai xadim Etibar Əliyev sosial şəbəkədə paylaşılan son açıqlamasında Azərbaycan təhsil sistemində baş verən ciddi problemləri gündəmə gətirib. O, nüfuzlu təhsil eksperti Kamran Əsədovun apardığı araşdırmalara əsaslanaraq bildirir ki, müəllimlərin sertifikasiyası prosesində imtahan sualları əvvəlcədən bəzi şəxslərə ötürülüb. Ekspert bu hadisəni “cinayət xarakterli” əməl kimi dəyərləndirib.

Etibar Əliyev, həmçinin Elm və Təhsil Nazirliyinin imtahan keçirməkdə bacarıqsız olduğunu bildirib. Onun sözlərinə görə, Riyaziyyat Olimpiadası çərçivəsində keçirilən imtahanda 30 sualdan 9-u səhv tərtib edilib. Lakin buna baxmayaraq, məsul şəxs Fuad Qarayev hər hansı məsuliyyət daşımayıb və əksinə, təşviq olunub.

Ekspert təhsildə qrant layihələrinə ayrılan milyonlarla manat vəsaitin effektiv olmadığını, təhsilin idarə olunmasının isə olduqca zəif vəziyyətdə olduğunu qeyd edib. O vurğulayıb ki, orta məktəb təhsili faktiki olaraq repetitorlara təslim olunub, məktəb direktorları isə məktəblərə gəlir gətirən obyekt kimi yanaşırlar.

Bundan əlavə, Etibar Əliyev təhsil işçilərinin, xüsusən də müəllim və alimlərin nazirlik tərəfindən daim aşağılandığını və motivasiyasızlaşdırıldığını iddia edib.

Digər bir ciddi ittiham isə dövlət vəsaitlərinin bölüşdürülməsi ilə bağlıdır. Onun sözlərinə görə, Azərbaycanın əleyhinə olan qüvvələrə yaxınlığı ilə tanınan təşkilatların üzvlərinə milyonlarla manat vəsait ayrılır. Həmçinin, təhsil sahəsinə heç bir aidiyyəti olmayan şəxslərin mühüm vəzifələrə gətirildiyi qeyd olunub.

Etibar Əliyevin bu açıqlamaları sosial mediada geniş müzakirələrə səbəb olub və ictimaiyyət arasında təhsil sisteminə olan inamın zəiflədiyini bir daha gündəmə gətirib.