Rusiyada müxalif mövqeyi ilə tanınan punk qrupu Riot-un keçmiş üzvü Rita Flores sensasion açıqlamalarla çıxış edib. Flores Rusiyanın Federal Təhlükəsizlik Xidməti (FSB) tərəfindən təhdid və təzyiq yolu ilə agentliyə cəlb edildiyini iddia edib.

News365.az xəbər verir ki, o Flores Port Media-ya müsahibəsində bildirib ki, 2023-cü ilin fevralında Moskvadakı evinə basqın edildikdən sonra FSB əməkdaşları onu əməkdaşlığa məcbur ediblər.

Onun sözlərinə görə, Ukraynada törədildiyi iddia olunan müharibə cinayətləri ilə bağlı sosial şəbəkələrdə etdiyi paylaşımlar səbəbilə barəsində cinayət işi açılacağı ilə hədələnib. Flores həmçinin ailəsinin də təzyiq altında saxlanıldığını və FSB əməkdaşlarının ailə üzvlərini öldürməklə hədələdiyini bildirib.

“Məni hər cür təhdid və təzyiqlə ələ almağa başladılar”, – Flores deyib.

Müxaliflər haqqında məlumat topladığı iddia edilir

Flores FSB tərəfindən “Harley” kod adı ilə fəaliyyət göstərməyə məcbur edildiyini və ondan rusiyalı sənətçilər, eləcə də siyasi müxaliflər barədə məlumat toplamasının tələb olunduğunu söyləyib.

Onun sözlərinə görə, əvvəlcə bu fəaliyyətə görə ona 30 min rubl – təxminən 360 dollar ödənilib. 2024-cü ilin əvvəlindən iyun ayına qədər isə aylıq ödənişin 50 min rubl, yəni təxminən 600 dollar olduğunu bildirib.

Flores həmçinin bəzi sənətçilərin saxlanılmasının qarşısını almaq və ya əməliyyatları gecikdirmək üçün FSB əməkdaşlarını bilərəkdən yanlış istiqamətləndirdiyini iddia edib.

Keçmiş sevgilisini öldürmək tapşırığı verilib?

Floresin açıqlamalarında ən diqqətçəkən iddia isə keçmiş Riot üzvü Pyotr Verzilovla bağlıdır.

O, ötən il Verzilovu Serbiyada bir kafeyə gətirməsinin ondan tələb edildiyini bildirib. Floresin iddiasına görə, plan həmin məkanda mülki geyimli FSB əməkdaşlarının Verzilovu qaçıraraq öldürməsi olub.

Bu tapşırığın qarşılığında ona 3 milyon rubl – təxminən 36 min dollar təklif edildiyi iddia edilir.

Flores bildirib ki, məhz bu təklif onun üçün dönüş nöqtəsi olub:

“Daha əvvəl sadəcə pasportumu geri alıb qaçmağımı gözləməli olduğumu düşünürdüm. Lakin həmin an onların nə qədər irəli gedə biləcəyini anladım”.

O, Verzilova qarşı planı qəbul etmədiyini və FSB əməkdaşlarını müxtəlif bəhanələrlə yayındıraraq insan haqları üzrə vəkil Dmitri Zaxvatovdan yardım istədiyini söyləyib.

Rusiyadan qaçıb

Flores daha sonra sürgündə yaşayan iş adamı Leonid Nevzlinin köməyi ilə bu ayın əvvəlində Rusiyanı tərk etdiyini açıqlayıb.

Rita Floresin iddiaları Rusiyada müxalif sənətçilər və fəallara qarşı təhlükəsizlik orqanlarının təzyiqləri ilə bağlı yeni müzakirələrə səbəb olub.

Qeyd edək ki, Floresin FSB ilə bağlı açıqlamaları onun öz iddialarına əsaslanır və təqdim olunan məlumatlarda Rusiya təhlükəsizlik qurumlarının bu ittihamlara münasibəti yer almır.