İsmayıllıda region gənclərinin virtual məşğulluğuna dəstək məqsədilə təlim keçirildi

29 oktyabr 2026-cı il tarixində İsmayıllı Dövlət Peşə Təhsil Mərkəzində “Rəqəmsal Gələcək” – Region gənclərinin virtual məşğulluğuna dəstək layihəsi çərçivəsində maarifləndirici təlim təşkil olunub.

Azərbaycan Respublikasının Gənclər Fondunun maliyyə dəstəyi, Qəbələ Regional Gənclərin Resurs Mərkəzi İctimai Birliyinin təşkilatçılığı ilə həyata keçirilən layihənin əsas məqsədi regionlarda yaşayan gənclərin rəqəmsal bacarıqlarını inkişaf etdirmək, onların müasir əmək bazarının imkanları barədə məlumatlılığını artırmaq və virtual məşğulluğa çıxışını dəstəkləməkdir.

Tədbirdə layihə rəhbəri Vüsalə Hümbətli iştirakçılara layihənin məqsədi, əsas vəzifələri və həyata keçirilməsi nəzərdə tutulan fəaliyyətlər barədə ətraflı məlumat verib. O, müasir dövrdə rəqəmsal bacarıqların gənclərin peşəkar inkişafında və məşğulluq imkanlarının genişləndirilməsində mühüm rol oynadığını vurğulayıb.

Daha sonra təlimçi Tacəddin İbadov tərəfindən virtual məşğulluq, frilans fəaliyyəti, süni intellekt texnologiyalarından istifadə, rəqəmsal iş alətləri və onlayn əmək bazarının imkanları mövzularında təlim keçirilib. İştirakçılara internet üzərindən gəlir əldə etmək imkanları, məsafədən iş modelləri və müasir texnologiyaların gündəlik əmək fəaliyyətində tətbiqi barədə məlumat verilib.

Təlim zamanı gənclərin rəqəmsal mühitdə öz imkanlarını reallaşdırması, yeni bilik və bacarıqlar qazanması, eləcə də virtual əmək bazarına inteqrasiyası məsələlərinə xüsusi diqqət yetirilib.

Qeyd edək ki, “Rəqəmsal Gələcək” layihəsi region gənclərinin müasir əmək bazarına hazırlanmasına və onların virtual məşğulluq imkanlarından daha səmərəli istifadə etməsinə dəstək göstərməyi hədəfləyir.