İran İsrailin Suriya ərazisinə hücumunu pislədi

İran İsrailin Suriyanın cənubundakı Beyt Cin bölgəsinə endirdiyi hava və quru zərbələrini kəskin şəkildə pisləyib.

News365.az xəbər verir ki, bunu İran Xarici İşlər Nazirliyinin sözçüsü İsmayıl Bəqayi deyib.

Ölkə rəsmisi İsrailin hücumu nəticəsində bir neçə suriyalının həlak olduğunu bildirib və hadisəni beynəlxalq hüququn pozulması, eləcə də regional sabitliyə təhdid kimi qiymətləndirib.

İ. Bəqayi vurğulayıb ki, region ölkələrinin xalqları İsrail təcavüzünə qarşı öz suverenliklərini və ərazi bütövlüklərini müdafiə etmək hüququna malikdir: "Suriyalı gənclərin İsrail qüvvələrinə qarşı silahlı müqaviməti təbii və legitim cavabdır".

O, BMT Təhlükəsizlik Şurasının Suriyaya və Livana qarşı İsrail hücumlarına adekvat reaksiya verməməsindən təəssüf etdiyini bildirib və bu passivliyin qlobal sülh və sabitlik üçün ciddi təhlükələr yaratdığını qeyd edib.