İran böhranının həlli üçün ABŞ-a Çinlə əməkdaşlıq lazımdır

Dünya

12:56

ABŞ–Çin münasibətləri və İran ətrafında yaranan gərginlik fonunda Vaşinqtonun Pekinlə mümkün əməkdaşlıq perspektivləri yenidən gündəmə gəlib. Ekspertlər hesab edirlər ki, regionda sülh və diplomatik həll yollarının tapılması üçün tərəflər arasında danışıqların davam etdirilməsi vacibdir.

Politoloq Əlimusa İbrahimov News365.az-a açıqlamasında bildirib ki, ABŞ və Çin arasında iqtisadi və ticarət sahələrində əməkdaşlığın gücləndirilməsi hər iki tərəfin maraqlarına xidmət edir.

Onun sözlərinə görə, hazırkı müzakirələr əsasən ticarət əlaqələrinin inkişafı, iqtisadi əməkdaşlıq və qarşılıqlı ehtiyac olan sahələrdə birgə fəaliyyətin genişləndirilməsi istiqamətində aparılır.

Politoloq qeyd edib ki, ABŞ Prezidenti Donald Trumpın Çinə səfəri çərçivəsində İran məsələsi də əsas müzakirə mövzularından biri olub.

Onun sözlərinə görə, Tramp bəyanatlarında ABŞ-ın İran məsələsində Çindən birbaşa yardım gözləmədiyini bildirsə də, bu mövzunun gündəlikdən tam çıxmadığını vurğulayıb.

Ə.İbrahimov bildirib ki, iki günlük səfər çərçivəsində keçirilən görüşlər yekun xarakter daşımır və yaxın günlərdə tərəflər arasında əlavə təmasların olması ehtimalı yüksəkdir.

Politoloq hesab edir ki, ABŞ və Çin arasında mövcud problemlərin qısa müddətdə tam həlli mümkün deyil və bu səbəbdən dialoqun davam etdirilməsi vacibdir.

Onun fikrincə, İran ətrafında yaranan vəziyyətin sülh yolu ilə həlli üçün Vaşinqtonun Pekinlə əməkdaşlığa ehtiyacı var və Çin bu prosesdə mühüm rol oynaya bilər.