"İdrak" liseyində baş verən insidentin SƏBƏBİ

Xəbər verdiyimiz kimi, bu gün səhər saatlarında Bakıda yerləşən “İdrak” liseyinin qarşısında silahlı insident baş verib. Liseyin 10-cu sinif şagirdi 28 yaşlı müəllimi – Şəhla Kamilovanı ov tüfəngi ilə güllələyib.

Nəticədə müəllim xəstəxanaya, şagirdsə barmaqlıqlar arxasına düşüb.

Nəzərə alaq ki, son zamanlar məktəblərdə buna bənzər insidentlər tez-tez baş verir.

Bəs, səbəb nədir?

Mövzu ilə bağlı News365.az-a danışan professor, təhsil üzrə ekspert Fərrux Rüstəmov deyib ki, bu gün məktəblərdə müəllim-şagird münasibətləri ciddi problemlərlə üzləşib:

“Şagirdlər müəllimlərini əsəbiləşdirir, videolarını çəkib sosial şəbəkələrdə paylaşır, onlara cavab qaytarır, hədələyir və hətta fiziki xəsarət yetirirlər. Bəzi hallarda aqressiya o həddə çatır ki, müəllimlərə bıçaqla xəsarət yetirilir və ya güllə atılır. Bu, dəhşətlidir. Bir insan ki, sizə elm öyrədir, sizə təhsil verir, ona necə əl qaldırmaq, onu necə təhqir etmək və hədə-qorxu gəlmək olar? Axı, Həzrət Əli demişdi: “Mənə bir hərf öyrənin, quluyam."

Problemin kökündə dayanan səbəblərdən danışan professor bildirib ki, əsas səbəb ailə mühiti və uşağın tərbiyəsidir:

“Uşaqlar evdə düzgün davranış modelləri öyrənmədikdə, hörmət və məsuliyyət anlayışı zəifləyir və bu, məktəbdə müəllimlərə qarşı aqressiv davranışlara çevrilir.

Bundan əlavə, şagirdlərin hərəkətləri demək olar ki, çılovlanmır. Müəllim şagirdin davranışına sərt müdaxilə edə bilmir, çünki hər addımında təzyiq altındadır və bəzən şikayət əsasında işini itirə bilər. Bu isə şagirdlərdə “istədiyim hərəkəti edə bilərəm” fikrini gücləndirir. Nəticədə məktəb mühiti dəyişir: müəllim şagirddən çəkinir, şagird isə müəllimə qarşı sərhədsiz davranır. Aqressiv valideynlər isə uşağını tənzimləyən müəllimi məhkəmə ilə hədələyir, “üst-başını qaydaya sal” və ya “saçını kəsdir” deyən müəllimləri təzyiq altına alır”.

Müsahibimiz hesab edir ki, sosial media və mobil telefonlar da bu problemi gücləndirir:

“Şagirdlər müəllimləri çəkib paylaşmaqla, onları ictimai təzyiq altında qoymaqla impulsiv və aqressiv davranışlarını artırırlar. Məktəb həyatı əvvəlki rəngarəngliyini itirmək üzrədir: hər şey testləşdirilib, uşaqların əxlaqi və mənəvi dünyası unudulub, hamını yalnız şagirdin intellektual uğurları maraqlandırır. Müəllimlərdə şagirdlərlə əlavə işləməyə maraq və həvəs azalıb. Yeni nəsil uşaqlarla işləmək getdikcə çətinləşir. Ailədə uşağın tərbiyəsində yol verilən boşluqlar, hörmət və məsuliyyət anlayışının zəif olması, müəllimə edilən təzyiq və onun səlahiyyətlərinin məhdudlaşdırılması, şagirdlərin hərəkətlərinin çılovlanmaması və məsuliyyət hissinin zəifliyi, sosial media və texnologiyanın aqressiv davranışları gücləndirməsi... Nəticədə yaranan vəziyyət çox ciddi sosial və pedaqoji problemə çevrilir. Müəllimlər öz şagirdlərindən qorxur, təhsil mühiti gərginləşir və məktəb bir cəmiyyət modeli olaraq normal davranış və intizamı qorumaqda çətinlik çəkir".

News365.az