Hər kəs üçün əhəmiyyətli olan platforma

“Zaman imkan vermədiyi üçün bir neçə gün əvvəl Mərkəzi Bankının dəvət etdiyi İnteraktiv Statistik Məlumat Bazasının təqdimatında iştirak edə bilməmişdim. Yalnız indi bu interaktiv platforma ilə tanış oldum və tam səmimiyyətimlə deyirəm: çox sevindim.

Sadə bir səbəb deyim: Mərkəzi Bankın saytındakı statistika bölməsində 8 yarımbölmə var və onların hər birində saysız-hesabsız Excel cədvəlləri yerləşdirilib. Ümumilikdə 100-dən çox belə fayllar vardı. Hər hansı əsas göstərici ilə tanış olmaq üçün xeyli vaxt və resurs sərf olunurdu. Saytın strukturunu bilməyən, məlumat axını ilə işləmək təcrübəsi olmayan jurnalistlər, tələbələr və sıravi vətəndaşlar üçün o məlumatlar, sözün əsl mənasında, çox "dərində" idi”.

Bunu News365.az-a söhbətində iqtisadçı ekspert Eldəniz Əmirov deyib. O, bildirib ki, bu platforma jurnalistlər, tələbələr, analitiklər və qərarvericilər üçün məlumatların əlçatanlığı baxımından mühüm imkanlar yaradır:

“Ən əsası isə, məlumatlar köhnəlmədən və real vaxt rejimində təqdim olunur.

Bəlkə də bütün qurumların saytlarında belə imkanlar olsaydı, Mərkəzi Bankın bu təşəbbüsü məni bu qədər sevindirməzdi. Axı insan adiləşmiş, normaya çevrilmiş hallara o qədər də sevinmir. Amma hazırkı reallıqda bu təşəbbüs müasir idarəçilikdə kommunikasiyanın necə olmalı olduğuna dair nümunə sayıla bilər.

Buna görə də Mərkəzi Bank komandasına təşəkkür edirəm!

Sonda bir məsələni də qeyd edim ki, təqdim olunan platformada bəzi statistik sahələr üzrə məlumat çatışmazlığı hiss olunur. Ümid edirəm ki, gələcəkdə bu boşluqlar da doldurulacaq və platforma daha da təkmilləşdiriləcək”.

News365.az