Gürcülər azərbaycanlıların stadion tikməsinə mane OLDU

Tiflisdə 876 milyon lari (325 milyon ABŞ dolları) dəyərində yeni stadionun tikintisi üçün keçirilən tender ləğv edilib.

News365.az Gürcüstan mətbuatına istinadən xəbər verir ki, müvafiq qərarı Gürcüstan Bələdiyyələrin İnkişafı Fondunun Tender Komissiyası qəbul edib.

Komissiya təqdim edilmiş təkliflərə baxıb. İki iştirakçı, Azərbaycan-Gürcüstan birgə müəssisəsi “Makro – İnşaatçı” və Türkiyənin “YDA İnşaat” şirkəti təkliflər natamam olduğuna görə tenderdən çıxarılıb.

Nəhayət, Gürcüstanın “Anagi” şirkəti yeganə iddiaçı olaraq qalıb, lakin şirkətin təklifi digər iştirakçıların təklifini xeyli üstələyib. Bu mərhələdə Bələdiyyələrin İnkişafı Fondu qalibi müəyyən edə bilməyib.

“Anagi” və digər diskvalifikasiya edilmiş şirkətlərin təklif etdiyi qiymət fərqi əhəmiyyətli olduğundan, tender komissiyası tenderin dayandırılması və şərtlərə yenidən baxılması barədə qərar qəbul edib.

"Anagi" - 850 milyon (314,8 milyon ABŞ dolları)

“Makro – İnşaatçı” – 789,42 milyon (292,4 milyon ABŞ dolları)

“YDA İnşaat”  SANAYİ VE TİCARET ANONİM ŞİRKETİ - 744,93 milyon (275,9 milyon ABŞ dolları).

Gürcüstanın baş naziri İrakli Kobaxidze bundan əvvəl bildirib ki, gələcək stadion Britaniya modeli üzrə tikiləcək. O əlavə edib ki, yeni hava limanının yaxınlığında seçilmiş yer hərtərəfli infrastrukturun inkişafına imkan verəcək.