Dünyanın ən uzunömürlü canlısı

News365.az xəbər verir ki, Qrenlandiya köpəkbalıqları (Somniosus microcephalus) dünyanın ən uzunömürlü canlılarından biri hesab olunur və yüz illərlə yaşaya bilirlər. Bu nəhəng canlıların maksimum uzunluğu 6,4 metr, çəkisi isə 1400 kq-a qədər çata bilər.

Maraqlıdır ki, onların iri ölçülərinə baxmayaraq, xərçəng və digər xəstəliklərə çox nadir hallarda rast gəlinir. Son araşdırmalar bu fenomenin sirrini açmağa kömək edib.

Alimlər tərəfindən aparılan genom tədqiqatları göstərib ki, Qrenlandiya köpəkbalıqlarının uzunömürlü və xəstəliklərə davamlı olmasının səbəbi DNT bərpa mexanizmlərinin yüksək effektivliyi və hüceyrə bölünməsinin xüsusi tənzimlənməsi ilə bağlıdır. Xüsusilə, NF-kB proteininin iltihablanma, immun sistemi və hüceyrə sağlamlığının qorunmasında əsas rol oynadığı müəyyən edilib.

Bu tapıntılar gələcəkdə insanlarda yaşlanma prosesini yavaşlatmaq və xərçənglə mübarizə aparmaq üçün yeni tədqiqat istiqamətlərini müəyyən edə bilər.