Ermənistan idmançıları Gəncədə MDB oyunlarına qatılacaq

Vaşinqtonda imzalar atıldı, fotolar çəkildi və Azərbaycan-Ermənistan münasibətlərində yeni mərhələ başladı. Düzdür, hələ son sənədin imzalanmasına ən azı 9–10 ay var. Buna baxmayaraq, tərəflər düz yola çıxıb və üzü finişə doğru irəliləyirlər.

Paraflanan sülh sazişinin X bəndi tərəflərə müxtəlif sahələrdə əməkdaşlığın təsis edilməsi üçün yaşıl işıq yandırır. Cəmi 7 həftə sonra, mərkəzi Gəncə olmaqla, Xankəndi də daxil 7 şəhərdə 3-cü MDB Oyunları başlayacaq. Son məlumata əsasən, Azərbaycanla yanaşı, 7 ölkə artıq bu oyunlarda iştirakını rəsmən təsdiq edib. İrəvanın rəsmi xətti bu günə qədər belə idi ki, təhlükəsizlik məsələləri tam aydınlaşandan sonra qərar veriləcək. Vaşinqtonda keçirilən görüş və imzalanan sənədlər təhlükəsizliklə bağlı parametrləri tamamilə aydınlaşdırdı. Artıq qatılmamaq üçün bəhanə gündəlikdən çıxıb. Əksinə, yaranmış fürsətdən maksimum istifadə edib, qatılmaqla etimadın formalaşdırılması üçün ilk addımı atmaq olar.

Bundan öncə də Ermənistan idmançıları Bakı Avropa Oyunlarına təkcə qatılmamış, həm də kürsüyə çıxmışdılar və onları mükafatlandıran da Azərbaycan prezidenti olmuşdu. O zaman da Azərbaycan Ermənistan heyətinə tam təhlükəsizlik təminatı vermişdi. Düşünürəm ki, yaxın 2 həftə ərzində Ermənistan tərəfi 3-cü MDB Oyunlarında iştirakını rəsmən təsdiq edəcək. Beləliklə, idman oyunlarını siyasi şouya çevirmək istəyənlərin də Netflixə baxmaqdan başqa çarəsi qalmayacaq.

Aqil Məmmədov, ekspert