Bu millətə necə qıydın, a Ramiz?!- Tural İrfandan həcv

Cəmiyyət

09:29

Payımıza düşən ömrü də yedin,

Qanlar içdin, dəri soydun, a Ramiz.

Daşı, torpağı, dəmiri də yedin,

Qəti inanmaram doydun, a Ramiz.

Ləkə yaxıb təmiz adlar kirlətdin,

Böhtan yıxıb neçəsini şərlətdin,

Cana yığdın, bu milləti çərrətdin,

Çox yetimi mələr qoydun, a Ramiz.

Vəzir, vəkil qabağında əsirdi,

Vaxt var idi çoxu sənə əsirdi,

Qılıncının qəbzəsi də kəsirdi,

Başlar üzüb gözlər oydun, a Ramiz.

Qarsanba Kavının ömrü talandı,

Bu xalqa sitəmin yadda qalandı.

Mənim tək yüz minlər oda qalandı,

Bu millətə necə qıydın, a Ramiz?!

Deyir daha vaxtını şeir-bayatı yazmaqla keçirən Boz Kardinal elimizin müqtədir şairlərindən olan Qarsanba Kavının yuxarıdakı həcvinə belə cavab verib:

Əzizim, Ramiz ağlar,

Duman ağlar, sis ağlar,

"Şura" nın nəhs zalında

Boş kreslo, miz ağlar...

Fələyin üzü bozmuş,

Taleyi qara yazmış...

Kremli viran qalsın,

Planları o pozmuş...

Hey aləmi qatırdım,

Yaxşı yeyib yatırdım,

Yığdığım milyonları,

Heyf, axırda batırdım...

Ömrün sonu kədərdi,

Həbs ölümdən betərdi,

Kim nə deyir qoy desin:

Ramiz çəkməz bu dərdi...

Turan İrfan, AYB-nin üzvü, şair