ÜST Yaxın Şərqdə mümkün nüvə ssenarisi üçün hazırlıqlar görür - HƏYƏCANLI AÇIQLAMA

Ümumdünya Səhiyyə Təşkilatı (ÜST) Yaxın Şərqdəki münaqişə fonunda nüvə silahının istifadəsi ehtimalı üzrə ssenariyə hazırlaşır.

News365.az xəbər verir ki, bu barədə ÜST-ün Şərqi Aralıq dənizi üzrə regional direktoru Hanan Balxi "Politico"ya verdiyi müsahibədə açıqlayıb:

"Ən pis ssenari nüvə hadisəsidir və bizi ən çox narahat edən də elə budur. ÜST işçiləri atom bombasının istifadəsi və ya nüvə obyektinə hücum da daxil olmaqla, bu cür hadisələrə hazırdırlar".

Bununla belə, o əlavə edib ki, nüvə silahından istifadə edilərsə, dünyaya dəyəcək zərərin qarşısını heç bir hazırlıq ala bilməz. ÜST nümayəndəsinin sözlərinə görə, əgər bu baş verərsə, nəticələr onilliklər boyu hiss olunacaq.

Daha əvvəl politoloq Qriqori Yarıgin qeyd etmişdi ki, ABŞ nüvə vasitələrindən yalnız Tehran kütləvi qırğın silahlarından istifadə potensialı ilə bağlı təhdid yaratdığı təqdirdə istifadə edəcək. Ekspertin fikrincə, bu təhlükə miqyas və təsir baxımından 11 sentyabr terroru ilə müqayisə edilə bilər.

Yarıgin vurğulayıb ki, hazırda Yaxın Şərqdəki münaqişə ABŞ-nin İrana qarşı potensial olaraq nüvə silahından istifadə etməsi üçün lazımi şərait yaratmayıb.