Manat KƏSKİN UCUZLAŞACAQ?

Son günlər Azərbaycan manatının növbəti dəfə devalvasiyası ilə bağlı müxtəlif iddialar dolaşmaqdadır.

Bakıvaxtı.az-ın məlumatına görə, bəzi ekspertlər yaxın müddətdə milli valyutamızın dollar qarşısında kəskin ucuzlaşa biləcəyini vurğulayır. Proqnozlara görə, hazırda dollar qarşısında 1.70 kursu saxlayan manatın 2.00 qədər ucuzlaşması gözlənilir.

Məsələn, iqtisadçı-ekspert Natiq Cəfərli mətbuata açıqlamasında bildirib ki, devalvasiya gözləniləndir və iqtisadiyyata olduqca mənfi təsirlər göstərəcək:

“Devalivasiya ilə bağlı qərar inzibati olaraq veriləcək. Yəni manatın məzənnəsi Mərkəzi Bank və hökumətin birgə verəcəyi qərardan asılıdır. Bazarda baş verən proseslər manatın məzənnəsinə təsir etmir. Amma devalvasiyanın olması ehtimalı yüksəkdir. Çünki artıq 9 ildir ki, sabit məzənnə rejimidir. Bu, uzun müddət davam edə bilməz. Biz bunu 2005 və 2015-ci illərdə gördük. Bu illər ərzində üçpilləli devalivasiya oldu. Azərbaycan manatının dəyərdən düşməsi, təbii ki, infiliyasiya sürətləndirəcək və ölkə daxilində qiymət artımına təkan verəcək”.

News365.az xəbər verir ki, Mövcud iddialarla bağlı danışan iqtisadçı-ekspert Pərviz Heydərov qeyd edib ki, Azərbaycan manatının ölkənin tədiyyə balansı üzrə göstəricisin müsbət saldoda qalması, xarici ticarət dövriyyəmizdə ixracın idxalı üstələyəcəyi şəraitdə, ümumiyyətlə xam neftin dünya bazar qiymətlərinin dövlət büdcəmizdə fiksə olunan qiymətdən üstün olacağı halda devalvasiyası heç bir şəkildə gözlənilmir:

"Çünki bu, hökumətə sərfəli deyil. Məlumdur ki, bizdə üzən məzənnə rejimi mövcud deyil, manatın məzənnəsi inzibati üsulla tənzimlənir. Bu da ondan irəli gəlir ki, ölkəyə xarici valyuta axını yalnız bir kanal və yaxud mənbə hesabına daxil olur. Bu da neft və qaz satışıdır”.

Pərviz Heydərov: Ölkəyə xarici valyuta axını yalnız bir kanal və yaxud mənbə hesabına daxil olur

“Odur ki, milli valyutamızın dəyəri bunların xaricə satış qiymətlərindən asılıdır", - deyə Pərviz Heydərov vurğulayıb.