Aİ Ukraynaya sursat almaq üçün nə qədər pul toplayıb?

Avropa İttifaqı artıq Ukraynanın ehtiyacları üçün sursat almaq istiqamətində lazım olan məbləğin üçdə ikisini toplayıb. UNİAN-ın yaydığı məlumata görə, bunu Avropa İttifaqının (Aİ) ali nümayəndəsi Kaya Kallas Lüksemburqda Aİ-yə üzv ölkələrin xarici işlər nazirləri səviyyəsində Aİ Şurasının iclası başlamazdan əvvəl deyib. O, yığılmalı olan məbləğin 5 milyard avro olduğunu qeyd edib.

"Biz bu müharibədə ən ölümcül hücumları görürük. Mülki insanlar ölür. Təbii ki, Ukraynanın qeyd-şərtsiz atəşkəsə razılaşdığı müddətdən bir ay keçib. Biz bunu Rusiya tərəfdən görmədik. Aydın məsələdir ki, indi Ukraynaya daha çox dəstək verməliyik. Mən çox şadam ki, mənim silah-sursat təşəbbüsümün reallaşması üçün lazım olan maliyyə vəsaitinin üçdə ikisi artıq əlimizdədir. Amma təbii ki, biz daha çox iş görməliyik",- Kallas qeyd edib.

Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçdi. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Ukrayna ordusu 2024-cü ildə gözlənilmədən Rusiyanın Kursk vilayətinə girdi. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib. Kurskun işğalda qalmış əraziləri yenidən geri qaytarılıb.

Tural