"Xalqın legitim hakimiyyətinə qarşı çevrilişə çalışan “başda oturan” kimdir?"- Deputat

“Bir xalqın dəyərlərinə çamur atmaq təkcə hüquqi məsuliyyət yaratmır, həm də ictimai qınaq yaradır. Əslində bu cür addımlar cəmiyyətin dəyərlərini dəyərsizləşdirməyə, ictimai əxlaqa zərbə vurmağa hesablanıb. Azərbaycanın Prezidentinin ailəsinə qarşı yalan məlumatlar, feyk görüntülər yayaraq informasiya müharibəsi aparan bir qrupun DTX tərəfindən ifşa edilməsi hesab edirəm ki, ictimai maraqlarımız kontekstində, həm də   mənəvi dəyərlərimiz kontekstində müham bir hadisədir”.

Bu fikirləri News365.az -açıqlamasında Millət vəkili Hikmət Babaoğlu deyib.

O qeyd edib ki, onsuz da Azərbaycanın ictimai rəyi intelektual əsaslarda formalaşıb:

“Və hər kəs nəyin nə olduğunu çox yaxşı ayırd edə bilir. Çox təəssüf ki informasiya manipulyatorlarının toruna düşən, olmayan şeyi həqiqət kimi qəbul edən müəyyən bir təbəqə də olur. Ona görə də son proseslərdən biz bir neçə nəticə çıxartmalıyıq. Bunlardan birincisi odur ki, Azərbaycana tarixi qələbə bəxş etmiş, Azərbaycan xalqına böyük qalibiyyət yaşatmış və rifah gətirmiş Prezident və onun ailəsi bu vaxta qədər olduğu kimi bundan sonra da xalqımız və ictimaiyyət tərəfindən daha çox qorunmalıdır.

İkincisi, bizim dəyərlərimizi əlimizdən almağa çalışan informasiya terrorçuları hüquqi müstəvidə mütləq məsuliyyətə cəlb olunmalıdır. DTX-nın yaydığı telefon danışıqlarında  verilən mesajlar, göstərilən ünvanlar təkbətək öyrənilməli, ifşa edilməli və məsuliyyətə cəlb edilməlidir.  Bu gün Azərbaycan ictimaiyyətini narahat edən bir sual var: Bizim dövlətçiliyimizə, müstəqil siyasətimizə qəsd etmək istəyən, xalqın legitim hakimiyyətinə qarşı çevrilişə çalışan “başda oturan” kimdir?

Bu sual hər kəsi narahat edir. Biz bu gün məhz Azərbaycan Prezidentinin, onun ailəsinin və böyük mənada Ulu öndər Heydər Əliyevdən gələn müqəddəs ailə dəyərləri sayəsində sülh və rifah içərisində qalib xalq kimi yaşayırıq. Ona görə də bu dəyərlər Azərbaycan dövlətinin ali dəyərləridir, milli dəyərləridir. Və bunu qorumaq hər birimizin borcudur. İfşa eləməksə xüsusi xidmət orqanlarının vəzifəsidir ki, bundan sonra da sülh və rifah içərisində yaşayaq”.

News365.az