İnsanların gəlirləri ölkələrin iqtisadi “termometri”dir”

“Ailə gəlirləri artdıqca büdcədə ərzaq məhsullarına xərclərinin payı azalır. Bu fakti ilk dəfə  XIX əsrdə alman statistik Ernst Engel iqtisadi qanun şəklinə salıb. Ona görə də buna Engel qanunu deyirlər. Səbəb çox sadədir”.

Bunu News365.az-a açıqlamasında iqtisadçı ekspert Eldəniz Əmirov deyib. O bildirib ki, insan nə qədər çox qazansa da, mədəsi böyümür:

“İnsanın mədəsi aşağı-yuxarı yaxın həcmdə qida qəbul edə bilir. Ən pis halda gözü doymayan biri digərindən 3-5 dəfə çox yeyəcək. Amma mədədə təzyiq artan kimi, gözün hərisliyinin qarşısı alınır.

Lakin qeyri-ərzaq məhsullarını toplamaq üçün fiziki tutum məhdudiyyəti yoxdur. Ona görə də gəlirlər artıqca, insan "bəsdir" demir, “iştah”ı dayanmadan sonsuza qədər böyüyür. Daha bahalı geyimlər, daha bahalı avtomobil, ardınca avtomobillər, daha müasir texnologiyalar, daha gözəl evlər, mülklər, imkan varsa hətta şəxsi təyyarələr.

Yəni gəlir yüksəldikcə insanın qarnından daha çox qeyri-ərzaq arzularına ayırdığı xərclər artır. Buna görə də gəlirlər ardıqca ümumi büdcədə ərzağın payı getdikcə azalır.

İki nümunə yazacam. Məsələn, ABŞ-da ərzaq xərcləri ailə büdcəsinin orta hesabla 6,7%,-I təşkil edir. Cənubi Sudanda isə ailələr xərclərinin 90.6 %-ni ərzağa sərf edir.

Ona görə də hər bir ölkədə insanların gəlirlərindən ərzağa ayırdığı pay həmin ölkənin iqtisadi səviyyəsi üçün çox ciddi iqtisadi göstəricidir. Hətta deyərdim ki, bu ölkələrin iqtisadi “termometri”dir”.

News365.az