Paşinyanın növbədənkənar seçki blefi
Ermənistanda növbədənkənar parlament seçkiləri məsələsi yenidən siyasi gündəmə gəlib. Baş nazir Nikol Paşinyanın Konstitusiyaya dəyişikliklər etmək niyyəti fonunda erməni professor seçkilərin təkrar keçirilməsinin zəruriliyini şübhə altına alıb. Hakimiyyət başçısının İrəvan küçələrində vətəndaşlarla görüşməsi isə ictimai narazılıqları dinləmək və hökumətin proqramlarını təqdim etmək cəhdi kimi diqqət çəkir.
İrəvan Dövlət Universitetinin sosiologiya fakültəsinin tətbiqi sosiologiya kafedrasının müdiri, siyasi elmlər doktoru, professor Artur Atanesyan "Hraparak"a deyib ki, Ermənistanda yaxın vaxtlarda növbədənkənar parlament seçkilərinin keçirilməsi üçün ciddi siyasi əsaslar görünmür.
Politoloqun fikrincə, iyunun 7-də keçirilən seçkilərin nəticələri və seçici fəallığı Ermənistanda siyasi qüvvələrin sayının azaldılmasının və daha konkret siyasi seçimlərin təklif olunmasının vacibliyini göstərir. O düşünür ki, yeni seçkilərdə iştirakçıların sayının artması müxalifətin cəmiyyətdəki dəstəyini avtomatik olaraq genişləndirməyəcək. Əvvəlki seçkilərdə iştirak etməyən seçicilərin yenidən səsverməyə gəlməməsi, seçkilərin tez-tez təkrarlanması səbəbindən seçici fəallığının daha da azalması mümkündür.
Atanesyanın sözlərinə görə, növbədənkənar seçkilər yalnız ölkədə ciddi daxili siyasi dəyişikliklər baş verdikdə və siyasi qüvvələrə ictimai etimad səviyyəsi əhəmiyyətli dərəcədə dəyişdikdə əsaslandırıla bilər. Onun qənaətinə görə, iyunun 7-dən sonra Ermənistanda yeni seçkiyə zərurət yaradacaq miqyasda siyasi dəyişiklik baş verməyib.
Professor müxalifətin əvvəlki seçkilərdən nəticə çıxarmalı olduğunu da vurğulayıb. Onun fikrincə, müxalifət qüvvələri parçalanmış şəkildə mübarizə aparmaq əvəzinə bir blokda birləşməli, seçicilərə daha aydın və vahid siyasi alternativ təqdim etməlidirlər. Atanesyan əlavə edib ki, iyunun 7-də keçirilən seçkilərdə seçki saxtakarlığı halları da qeydə alınıb.
O, Konstitusiyanın tez-tez dəyişdirilməsini və seçkilərin mütəmadi təkrarlanmasını dövlətin siyasi sabitliyinə mənfi təsir göstərən amillər kimi qiymətləndirib. Professorun fikrincə, seçkilər həm də məhdud imkanlara malik Ermənistan büdcəsi üçün əlavə maliyyə və təşkilati yükdür.Atanesyan hesab edir ki, hakimiyyət ciddi dəyişikliklər etmək istəyirsə, bunun üçün mütləq yeni seçkilərə getməli deyil. Onun fikrincə, hökumət müxalifətlə əməkdaşlıq edə, ümummilli layihələr hazırlaya və ölkədə fəaliyyət göstərən bütün siyasi qüvvələrə bu təşəbbüslərdə iştirak imkanı yarada bilər.
Növbədənkənar seçki müzakirələri fonunda Nikol Paşinyan İrəvanın Açapnyak inzibati rayonuna səfər edərək sakinlərlə görüşüb, onların problemlərini dinləyib və hökumətin həyata keçirdiyi proqramlar barədə danışıb.
“Armenpress”in məlumatına görə, görüşlər zamanı sakinlər mənzil şəraiti, həyətlərin abadlaşdırılması, uşaq meydançalarının yenidən qurulması, təhsil, məşğulluq və sosial problemlərlə bağlı suallar ünvanlayıblar. Vətəndaşlar, həmçinin əmlak mübahisələri ilə bağlı narahatlıqlarını ifadə ediblər.Paşinyan köhnə yaşayış binalarının yerində yeni məhəllələrin salınması ideyasını da gündəmə gətirib. O, investorlar və sakinlərlə razılaşdırılmış variantlardan danışaraq, yeni binalarda mənzil əldə edilməsi və tikinti müddətində sakinlərin yerləşdirilməsi məsələlərinə toxunub. Baş nazir həyətlərdəki uşaq meydançalarının saxlanılması və infrastrukturun vaxtında təmir edilməsinin vacibliyini də vurğulayıb. Baş naziri səfər zamanı parlament sədrinin müavini Ruben Rubinyan, iqtisadiyyat naziri Gevorq Papoyan və digər rəsmi şəxslər müşayiət ediblər.
Paşinyanın vətəndaşlarla görüşləri hökumətin gündəlik problemlərə münasibətini göstərmək baxımından əhəmiyyətlidir. Bununla belə, küçə görüşləri və vətəndaşların şikayətlərini dinləmək özlüyündə növbədənkənar seçkilərə ictimai tələbin mövcudluğunu sübut etmir. Professor Atanesyanın açıqlaması da göstərir ki, Ermənistanda əsas müzakirə mövzularından biri yeni seçkilərin zəruriliyindən daha çox siyasi qüvvələr arasında etimad və əməkdaşlıq problemidir.
