Türk ordusu Suriya və İraqdan nə vaxt çıxacaq?
Türk qoşunlarının Suriya və İraqdan çıxarılması sərhəd təhlükəsizliyinə bağlı olan məsələdir.
News365.az xəbər verir ki, bu sözləri Türkiyənin müdafiə naziri Yaşar Gülər deyib
"Ankara qonşu ölkələrdəki hərbi mövcudluğunu yalnız sərhədləri boyunca təhlükəsizlik şərtləri təmin edildikdən sonra yenidən nəzərdən keçirəcək. Türkiyə cənub sərhədləri boyunca vəziyyətin kifayət qədər təhlükəsiz olduğunu hesab edənə qədər Suriya və İraqdakı hərbi mövcudluğunu saxlamaq niyyətindədir".
Türkiyənin müdafiə naziri Yaşar Gülər AFP xəbər agentliyinin suallarına verdiyi cavablarda bu fikirləri ifadə edib.
"Ankara hələlik qoşunlarını həmin qonşu dövlətlərdən çıxarmağa hazır deyil. İraq və Suriyada hərbi mövcudluğumuzu davam etdiririk. Regional və sərhəd təhlükəsizliyi üçün zəruri şərtlərin təmin olunduğunu müəyyən etdikdən sonra, bazalarımızın və regiondakı hərbi mövcudluğumuzun statusuna yenidən baxılacaq", - deyə Gülər bildirib.
Xatırladırıq ki, Türkiyə, milli təhlükəsizliyinə təhdid hesab etdiyi PKK terrorçuları və digər silahlı qruplaşmalarla mübarizə aparmaq zərurətini əsas gətirərək, Şimali Suriya və İraqda dəfələrlə hərbi əməliyyatlar həyata keçirib. 2016-cı ildə başlanan bir sıra sərhədyanı əməliyyatlardan sonra Türkiyə ordusu Şimali Suriyadakı mövqelərini qoruyub saxlayıb. İraqda isə Ankara, PKK və İŞİD (DAEŞ) terrorçularına qarşı apardığı mübarizə çərçivəsində hərbi obyektlərdən ibarət şəbəkə qurub.
Nazirin bəyanatı Türkiyə ilə İraq arasında dərinləşən təhlükəsizlik əməkdaşlığı fonunda səslənib. Sentyabr ayında Ankara və Bağdad Mosul yaxınlığında yerləşən Başika-Zelikan hərbi düşərgəsinin mərhələli şəkildə İraq hakimiyyətinə təhvil verilməsi barədə razılığa gəliblər. Prosesin 2026-cı ilin sonuna qədər tamamlanması gözlənilir. Tərəflər bu razılaşmanı Şimali İraq üzərində dövlət nəzarətini gücləndirmək və silahlı qruplaşmalara qarşı mübarizə aparmaq səylərinin bir hissəsi kimi təqdim ediblər.
Eyni zamanda, bir bazanın təhvil verilməsi türk qoşunlarının İraqdan tamamilə çıxarılması demək deyil. Gülərin bəyanatından göründüyü kimi, Ankara təhlükəsizlik şəraitini müstəqil şəkildə qiymətləndirmək və bu qiymətləndirmələrə əsaslanaraq, müəyyən hərbi obyektlərin və regiondakı ümumi mövcudluğun saxlanılıb-saxlanılmayacağına qərar vermək niyyətindədir.
Türkiyənin Suriyadakı mövqeyinə həm bu ölkədəki siyasi keçid prosesindən sonrakı hadisələr və müxtəlif silahlı qruplaşmaların dövlət strukturlarına inteqrasiyası istiqamətindəki səylər də öz təsirini göstərir. Ankara Suriya dövlətinin nəzarəti altında vahid təhlükəsizlik sisteminin yaradılmasını dəstəkləyir və sabitlik, eləcə də terrorizmlə mübarizə məsələlərində Dəməşqlə əməkdaşlıq etməyə hazır olduğunu hər zaman elan edir.
Yaşar Gülər istər Suriyadan, istərsə də İraqdan qoşunların mümkün çıxarılması ilə bağlı konkret vaxt çərçivəsi açıqlamayıb. Onun sözlərinə görə, hərbi mövcudluqla bağlı istənilən dəyişiklik yalnız zəruri təhlükəsizlik şərtləri təmin edildikdən sonra mümkün olacaq, konkret qərarlar isə Türkiyə sərhədləri boyunca vəziyyətin necə inkişaf edəcəyindən asılı olacaq.
