Trampın böyük planı: Putin və Si Cinpinlə görüş dünya xəritəsini dəyişə bilər?

Tramp Putin və Si Cinpinlə görüşərək dünya nizamını dəyişə bilər

Dünyanın aparıcı gücləri arasında münasibətlərin gələcəyi və beynəlxalq təsir dairələrinin bölüşdürülməsi məsələsi yenidən gündəmə gəlib. ABŞ, Rusiya və Çin arasında mümkün siyasi razılaşmalar qlobal təhlükəsizlik sisteminə, NATO-nun gələcəyinə və Asiya-Sakit okean regionundakı güc balansına ciddi təsir göstərə bilər. Belə bir şəraitdə Vaşinqtonun Moskva və Pekinlə münasibətlərinin hansı istiqamətdə inkişaf edəcəyi xüsusi maraq doğurur.

News365.az “The Wall Street Journal” qəzetinə istinadən xəbər verir ki, ABŞ prezidenti Donald Tramp Rusiya prezidenti Vladimir Putin və Çin lideri Si Cinpinlə üçtərəfli sammit keçirmək niyyətindədir.

Nəşrin redaksiya məqaləsində mümkün görüşün nəticələri 1945-ci ildə keçirilmiş Yalta Konfransı ilə müqayisə olunub. Qəzet hesab edir ki, belə bir sammit dünya üzrə təsir dairələrinin yenidən bölüşdürülməsinə zəmin yarada bilər.

WSJ-nin qiymətləndirməsinə görə, Tramp uzun müddətdir Rusiya və Çinlə genişmiqyaslı razılaşmalar əldə etməyə maraq göstərir. Nəşr ABŞ prezidentinin Ukrayna və Avropa ilə bağlı hazırkı siyasətinin də daha geniş geosiyasi strategiyanın tərkib hissəsi ola biləcəyini istisna etmir.

Qəzet, həmçinin ABŞ-ın Rusiya nefti və dizel yanacağına tətbiq etdiyi sanksiyaların son vaxtlar yumşaldılmasına diqqət çəkir. Nəşrin fikrincə, bu addım Vaşinqtonun Moskva ilə daha geniş razılaşma əldə etmək istəyinin göstəricisi ola bilər.

WSJ xəbərdarlıq edir ki, belə bir razılaşma NATO daxilində parçalanma riskini artıra, ABŞ-ın Sakit okean regionundakı mövqelərini zəiflədə və Çinin Tayvan üzərində təzyiqini gücləndirməsinə şərait yarada bilər.

News365.az