Şəbəkə siqnalı necə yaranır?

Mobil telefonda şəbəkə siqnalı zəng etmək, mesaj göndərmək və internetdən istifadə etmək üçün vacibdir. 

Bəs bu siqnal necə yaranır və telefonumuza necə çatır?

News365.az xəbər verir ki, mobil şəbəkə siqnalı radio dalğaları vasitəsilə ötürülür. Bu proses mobil telefonlarla baza stansiyaları arasında simsiz əlaqə yaradılması nəticəsində baş verir.

Mobil operatorların quraşdırdığı antenalar radio dalğalarını qəbul edir və ötürür. Telefon yaxınlıqdakı baza stansiyasına qoşularaq səs, mesaj və internet məlumatlarını bu stansiya vasitəsilə şəbəkəyə çatdırır.

Siqnalın gücü bir neçə amildən asılıdır. Telefonun baza stansiyasına yaxınlığı, binaların qalın divarları, dağlıq ərazilər və digər maneələr siqnalın zəifləməsinə səbəb ola bilər.

Buna görə də mobil şəbəkə siqnalı açıq ərazilərdə daha güclü, zirzəmilərdə və qalın divarlı binaların daxilində isə daha zəif ola bilər.

Siqnalın yaranması üçün telefonun özündə də radioötürücü və qəbuledici sistemlər fəaliyyət göstərir. Bu sistemlər sayəsində telefon və mobil şəbəkə arasında məlumat mübadiləsi həyata keçirilir.