Qadınlarda ürək xəstəliyinin gizli əlamətləri: Bu simptomları gözardı etməyin!

Ürək xəstəlikləri hər zaman sinədə kəskin ağrı ilə müşayiət olunmur. Bəzən adi yorğunluq, gündəlik işlər zamanı tez təngnəfəs qalmaq və ya səbəbsiz başgicəllənmə orqanizmin ciddi xəbərdarlığı ola bilər. Xüsusilə qadınlarda ürək-damar problemləri fərqli əlamətlərlə üzə çıxdığından bu siqnalları vaxtında tanımaq böyük əhəmiyyət daşıyır.

Kardioloq Karla Okabe “Terra” nəşrinə müsahibəsində qadınlarda ürək xəstəliklərinin hansı əlamətlərlə özünü göstərə biləcəyini izah edib.

Həkimin sözlərinə görə, ürək-damar xəstəliklərinin əlamətləri qadınlarda kişilərlə müqayisədə fərqli ola bilər. Uzun müddət tibbi tədqiqatların əsasən kişilər üzərində aparılması xəstəliyin daha çox kişilərdə müşahidə edilən simptomlarının ön plana çıxmasına səbəb olub. Lakin sonrakı araşdırmalar qadınlarda fərqli şikayətlərin də diqqətə alınmasının vacibliyini göstərib.

Okabe qadınlarda ürək problemlərinin mümkün əlamətləri sırasında davamlı yorğunluğu, fiziki dözümlülüyün azalmasını və əvvəllər çətinlik çəkmədən yerinə yetirilən işlər zamanı nəfəs darlığının yaranmasını qeyd edib. Başgicəllənmə, ürək döyüntülərinin sürətlənməsi və bədənin müxtəlif nahiyələrində ağrılar da diqqətdən kənarda qalmamalıdır.

Kardioloq bəzi qadınların heç bir aşkar simptom hiss etmədən də ürək-damar xəstəlikləri baxımından risk qrupuna daxil ola biləcəyini vurğulayıb.

Onun sözlərinə görə, siqaret çəkən, fiziki aktivliyi az olan, artıq çəkidən əziyyət çəkən, yüksək qan təzyiqi, xolesterin və ya qan şəkəri səviyyəsi olan qadınlar mütəmadi tibbi nəzarətdə qalmalıdırlar. Otoimmün xəstəliklər, polikistik yumurtalıq sindromu, eləcə də ailədə infarkt və ya insult hallarının olması da riskin qiymətləndirilməsi zamanı nəzərə alınmalıdır.

Mütəxəssis ürək sağlamlığını qorumaq üçün yalnız aşkar əlamətlərin yaranmasını gözləməməyin, risk faktorları olduqda həkim müayinəsindən keçməyin vacibliyinə diqqət çəkib.

News365.az