Evlərini su basmış sakinlər Abşeron icra hakimiyyətinə yürüş etdi

Xəbər verdiyimiz kimi son günlər yağan yağışlar Abşeron rayonunda ciddi problemlərə yol açıb. Beləki, Masazır qəsəbəsində və Xırdalan şəhərində bir çox əraziləri su basıb.

 Nəticədə sakinlər üçün ciddi problemlər yaranıb. Fövqəladə Hallar Nazirliyi məsələyə müdaxilə etsə də problem tam həllini tapmayıb. Dekabrın 9-da görülmüş tədbirlər nəticəsində subasma ilə əlaqədar evlərini tərk etməkdə çətinlik çəkən 6-sı azyaşlı olmaqla ümumilikdə 25 vətəndaşın təxliyəsi və digər təhlükəsizlik tədbirlərinin görülməsi işləri həyata keçirilib. 

Lakin, bəzi küçə və evlər hələ də su altındadır. Sakinlər problemlə bağlı dəfələrlə Abşeron rayon İcra Hakimiyyətinə müraciət etsələr də nəticə yoxdur. İcra hakimiyyəti vəd verməklə işlərini bitmiş hesab edir. Nəticədə sakinlər arasında sosial narazılıq güclənir. Yerli icra strukturunun laqeyidliyi insanları daha yuxarı instansiyalara müraciət etmək məcburiyyətində qoyur.

Sakinlərdən News365.az –a verilən məlumata görə bu dəqiqlələrdə onlar Abşeron rayon İcra Hakimiyyətinin  qarşısına toplaşıblar. Onlar rayon rəhbərliyindən qəti tədbirlər görməyi tələb edir. Lakin, hələlik sakinləri razı salacaq bir hərəkət yoxdur.

Məsələ ilə bağlı Abşeron rayon İcra Hakimiyyəti ilə əlaqə saxladıq. Qurumdan News365.az-a bildirildi ki, aidiyyatı təşkilatların nümayəndələri tərəfindən koordinasiyalı şəkildə müşahidə edilən su kütlələrinin müxtəlif vasitələrlə axıdılması istiqamətində tədbirlər həyata keçirilmiş və yağış sularının axıdılması həyata keçirilməkdədir.

Mövzunu diqqətdə saxlayacağıq.

News365.az