ABŞ-dan xəbərdarlıq: Yaxın Şərqdə hava məkanı bağlana bilər

Yaxın Şərqdə təhlükəsizlik vəziyyətinin gərginləşməsi regionda yaşayan və səfər edən xarici ölkə vətəndaşları üçün riskləri artırır. Mümkün hərbi eskalasiya fonunda hava nəqliyyatında fasilələrin yaranması, uçuşların ləğvi və hava məkanının bağlanması ehtimalı da diqqət mərkəzinə gəlib.

News365.az xəbər verir ki, ABŞ Dövlət Departamenti Yaxın Şərqdə olan amerikalıları təhlükəsizlik vəziyyətinin pisləşə biləcəyi barədə xəbərdar edib.

Qurumun açıqlamasında bildirilir ki, regionda mürəkkəb təhlükəsizlik şəraiti səbəbindən ABŞ vətəndaşları yüksək sayıqlıq nümayiş etdirməlidirlər. Onlara mümkün uçuş ləğvlərini, hava məkanının bağlanmasını və nəqliyyat sistemində yarana biləcək problemləri nəzərə almaq tövsiyə olunur.

Dövlət Departamenti, həmçinin hərbi əməliyyatların təsirinin regiondan kənara yayılması ehtimalına diqqət çəkib. Xəbərdarlıqda qeyd olunur ki, İran və onunla əlaqəli qüvvələr xaricdə ABŞ-yə məxsus digər hədəflərə, eləcə də amerikalılarla əlaqəli obyektlərə qarşı addımlar ata bilərlər.

Potensial hədəflər sırasında ABŞ müəssisələri və digər qurumlar da göstərilib.

Açıqlama regionda təhlükəsizlik risklərinin yalnız hərbi əməliyyatların baş verdiyi ərazilərlə məhdudlaşmaya biləcəyi barədə narahatlıqları artırır.